Duha ka gipamusil, usa ang patay

CEBU, Philippines — Usa ang patay sa duha ka mga nahitabong pagpamusil sa  Purok  Mangga, Barangay Pajo ug Camella Homes,  Barangay  Pajac sa Dakbayan sa Lapu-Lapu sa managlahing takna sa wala mailhing mga mamumuno. Si Jeffrey  Baguio kinsa naglakaw sa maong dapit dihang ang wala mailhing lalaki kalit mipusil niini sa makadaghang higayon gamit ang kalibre 45 nga armas.

Si  Police  Officer  3  Marvin Saraum sa Homicide Section sa Lapu-Lapu City Police Office (LLCPO) miingon nga kasamtangan pa sila naghimo og dugang imbestigasyon sa pag-ila sa suspetsado ug ang pagsuta sa hinungdan sa maong pagpamusil sa biktima.

Laing pagpamusil nga nahitabo alas 5  pasado ang takna sa buntag sa Camella Homes sa Barangay Pajac  ug  ang biktima nga habal-habal drayber ang giila nga  mao si Alfonzo Mabunay Tuñacao  Jr., 39, taga Sangi Road, Barangay Pajo sa maong dakbayan.

Matud pa ni Police Officer 1 Jaymard Mollero sa Presinto 2 sa Lapu-Lapu City Police Office (LLCPO) ang  pasahero sa biktima nga nagpahatod kini ngadto sa Barangay Mactan ang nipusil kaniya.

Ang wala mailhing lalaki diha misakay sa luyo sa biktima ug gipusil ang biktima hinungdan sa pagkatagak niini sa yuta.

Ang gunman daling mimaneho sa motorsiklo sa biktima palayo.

Ang biktima nakabaton og daghang samad pinusilan sa iyang kalawasan ug dali kining gidala sa ambulansiya ngadto sa Vicente Sotto Memorial  Medical  Center sa Dakbayan sa Sugbo. (Rowena Capistrano ug Mary Rose Sagarino, CNU Intern/IBM)(BANATNEWS)