UV alumni homecoming

CEBU, Philippines — Gidapit ang tanang migradwar sa UV College of Education and Graduate School of Education sa pagtambong sa ipahigayong Grand Alumni Homecoming diha sa UV Main Campus karong Abril 21, adlaw’ng Sabado.

Kadtong sigurado nga motambong sa alumni homecoming, giawhag sa pagtawag sa 253-3182 ug 416-7994, ug mahimo usab nga mohimo’g pakisusi sa Facebook page “COED Grand Alumni Homecoming” sa dili pa ang gikatakda nga petsa.

Listahan sa mga establisamento i-update sa PSA regional office

Ang Philippine Statistics Authority (PSA)-7 mopahigayon og update sa mga listahan sa establisamento lakip na niini ang mga negosyo sugod karong Abril 16, 2018.

Sa 888 News Forum kagahapon sa buntag diha sa Marco Polo Hotel, si Noel Rafols tigpamaba sa PSA-7 mibutyag sa maong kalihukan.

“Atong mga business and industry atoang i-update, kuhaon ang mga importanteng impormasyon alang sa atoang pag-establish sa data base para sa atoang mga development planners, policy makers ug decision makers”.

Giawhag usab niya ang tanan nga mga establisamento sa pagsuporta ug pagtabang sa maong operasyon pinaagi sa pagtagad sa ilang mga field reporter nga mobisita sa ilang mga opisina.

Mapasalamaton usab siya sa mga media outlet sa paghatag kaniya og higayon aron mopadangat og update sa ilang mga kalihukan. (Mary Rose S. Sagarino, CNU Intern/BDB)

Banilad substation

sa VECO gi-upgrade

Gi-upgrade o gidoble sa Visayan Electric Company (VECO) ang power capacity sa Banilad substation aron masuplayan og igong kuryente ang mga lugar sama sa IT Park, Barangay Banilad ug dalan AS Fortuna, ilabi na nagkadaghan ang mga magpapatigayon ug kompaniya sa maong lugar.

Gipasalig sa VECO nga wala na’y mahitabo nga power outage o walay masinati nga kakulian sa source sa kuryente.

Gani sugod pa lang niadtong nilabay nga buwan sa Oktubre gidoble ang kanhi 33 mega volt ampere human nadugangan ug laing power transformer ang Banilad substation nga anaa usab  nahimutang diha sa compound sa main office sa VECO.

Matud ni Engineer Mark Anthony Kindica, Vice President for Customers Service Group sa VECO, tungod sa dugang transformer sa maong substation dali na lang unya ang pagdugang og power load gikan sa maong substation ngadto sa laing substation.

Gipaningkamutan usab nila nga madoblehan pa unya ang mga lain nga lugar sama sa Barangay Lahug ug Mambaling nga area. (BDB) (BANAT NEWS)