4-anyos napusilan sa 12-anyos patay
CEBU, Philippines — Patay ang 4-anyos nga batang babaye human naigo sa bala sa hinimo-himong de-bomba nga pusil sa iyang 12-anyos nga ig-agaw nibuto kini tumong sa iyang wala nga dughan pasado alas 2 kagahapon sa Sitio Agbangon, Barangay Adlaon, dakbayan sa Sugbo.
Sila si SPO3 Romel Bancog ug si PO2 Nemesio Dinopol nakadawat og tawag kagahapon alas 7:30 sa gabii para sa imbestigasyon ug dead person alarm sa Guba Emergency Hospital.
Sa inisyal nga imbestigasyon ang biktima ug ang 12-anyos nga ig-agaw niini niduaw sa balay sa ilang paryente nga si Fortunato Magdadaro. Ang mga bata pulos taga Tugbongan, Consolacion.
Matud pa gikuha sa 12-anyos ang de-bombang may bala nga jolen gikan sa sud sa balay apan aksidente niining nakablitan samtang natumong sa dughan sa ig-agaw ang maong armas.
Gidali og dala sa Guba Emergency Hospital ang biktima apan gideklarar nga dead on arrival sa mga doktor nga miatiman.
Niapil sa paghimo sa imbestigasyon si PO1 Ma. Theresa Jamiro, WCPD sa PS 8 tungod kay mga menor de edad ang nalambigit sa maong hitabo.
Matud pa ni Bancog mohimo pa sila og imbestigasyon aron pagsubay kon kang kinsa ang maong armas nga giduwaan sa mga bata. (Jomelyn B. Largado,CNU Intern/IBM) (BANAT NEWS)
- Latest
