Gwen: Kabilin ni Adlawan di malimtan
CEBU, Philippines — Masulob-on si Deputy Speaker Gwendolyn Garcia kinsa kongresista sa ikatulong distrito sa Probinsiya sa Sugbo sa kamatayon ni kanhi Asturias mayor ug kasamtangan bise mayor nga si Allan Adlawan.
Si Adlawan nitaliwan sa edad nga 56-anyos sa kanser sa baga pasado alas 2 sa kaadlawon niadtong Biyernes.
"I have lost a very dear, true and loyal friend," matud ni Garcia.
Matud ni Garcia nga si Adlawan daku kaayo og gikatampo sa kalambuan sa maong lungsod ingon man sa paghatag og panginabuhian sa katawhan.
"We have just lost a great servant leader of Asturias. He has left a legacy that many Asturiasnons will never forget," dugang ni Garcia.
Si Garcia nakabisita pa sa tambalanan kang Adlawan usa ka adlaw sa wala pa kini nipanaw.
Si Adlawan unang nangalagad isip konsehal sa Lungsod sa Balamban.
Niadtong 2007, nidagan siya pagka-mayor sa Lungsod sa Asturias ug nidaug hangtud napupos ang iyang termino sa 2016.
Nagpapili siya isip bise mayor samtang ang nihulip kaniya mao si Mayor Jose Antonio Pintor. (GMR)(BANAT NEWS)
- Latest
