Semana Santa di lang bakasyon
CEBU, Philippines — Nipahinumdum si Cebu Archbishop Jose Palma sa publiko nga hatagan og panahon ug gibug-aton ang pag-obserbar sa Semana Santa ilabi na sa mga Katoliko nga dili lang unta ang pagbakasyon maoy hunahunaon.
Matud ni Palma nga naandan na sa kadaghanan nga ang Semana Santa maanindot nga bakasyon tungod sa taas ang holidays nga walay trabaho ug bakasyon. Awhag ni Palma nga itagana ang Triduum sa Pasko sa Huwebes Santo, Biyernes Santo ug Sabado de Gloria diha sa Simbahan.
Dugang ni Palma nga angay lang maghinulsol ug dili lang pulos kalingawan ang huna-hunaon sa maong mga adlaw ug mas maayong mangompisal ug moapil sa nagkadaiyang kalihukan sa simbahan.
Gitug-an sa Arsobispo nga ang pagbakasyon mahimo sa bisan unsang adlaw ug oras apan ang Semana Santa kausa lang sa usa ka tuig.
Gikalipay usab ni Palma nga karong tuiga walay problema kalabot sa mohimo og kalingawan atol sa Biyernes Santo. (GMR) (BANAT NEWS)
- Latest