Laing kompaniya mopalit luna sa SRP
CEBU, Philippines — Usa ka pribadong kompanya ang niduso og unsolicited proposal nga mopalit ug mo-develop sa tulo ka ektarya nga luna sa South Road Properties sa Siyudad sa Sugbo.
Sa iyang Marso 8 nga suwat, si Federal Land president Pascual Garcia III niingon nga andam makig-alayon ang kompanya sa siyudad aron magbutang og siyam ka residential towers nga adunay restaurants ug laing mga pasilidad.
Matud ni Garcia nga andam sila mobayad og P2.39-billion sa Siyudad sa Sugbo alang sa equity sa 29,881 square meters nga ibaligya sa siyudad sa presyo nga P80,000 per square meter.
Sa niaging tuig, gitugtan na sa konseho sa Siyudad sa Sugbo si Mayor Tomas Osmeña nga mobaligya og tulo ka ektarya nga luna sa SRP pinaagi sa public bidding sa floor price nga P110,000 per square meter.
Ang tulo ka ektarya makahalin og P3.3-billion kun dunay mopalit sa maong presyo.
Ang ibaligya nga luna sa siyudad nahimutang sa SRP’s Pond F area o ang open space padulong sa opisina sa Department of Public Works and Highway-7.
Matud ni Osmeña nga duna nay daghang mopalit sa luna apan matud niya nga unang nakasumiter og papeles ang Federal Land bisan og wala pa siya moabli sa bidding alang sa pagbaligya sa luna.
Dugang ni Osmeña nga gusto niyang humanon ug isirado ang P18-billion nga investment sa Universal Hotels and Resorts Incorporated sa Kawit Island sa SRP una ibaligya ang tulo ka ektarya nga luna kay matud pa modaku og maayo ang balor sa yuta tungod sa dakung investment.
“There are many interested but they’re (Federal Land) the one that submitted. I did not ask them to submit but they submitted.
It’s a matter of timing. My job is to maximize what we can get for the city,” sigun sa mayor.
Sa pagkakaron, gitun-an pa sa konseho sa siyudad ang joint venture agreement kalabot sa P18-billion nga proposed integrated resort and casino sa SRP. (GMR) (BANAT NEWS)
- Latest
