P2.5M shabu nasakmit

CEBU, Philippines — Gibana-bana nga mobalor sa P2.5 ka milyon nga gituohang shabu ang nasakmit sa mga operatiba sa Philippine Drug Enforcement Agency (PDEA) – 7 sa gipahigayon nga buy-bust operation nga miresulta sa pagkasikop sa tulo ka mga gidudahang mga durugista sa Barangay Calawisan siyudad sa Lapu-Lapu niadtong Biyernes sa gabii.

Ang mga nasikop giila nga silang Demetrio Berame, 32; Kirby Berame, 28, ug Romel Jay Bering, 24, mga lumad sa maong lugar.

Matud pa ni Leia Albiar, tigpamaba sa PDEA-7 nga ang target sa operasyon mao si Demetrio nga gikonsiderar nga usa ka high value target.

Si Albiar midugang nga nakadawat sila og mga reklamo gikan sa komunidad kalabot sa kalambigitan ni Kirby sa ilegal nga drugas, apan sa ilang gipahigayon nga pagpaniid sulod sa usa ka semana ilang nahibaw-an nga bata-bata ra diay siya ni Demetrio nga maoy usa sa nangulo sa duwa sa ilegal nga drugas sa maong siyudad.

Nasakmit gikan sa grupo ang 15 ka paketeng gituohang shabu nga motimbang og dili mominos 500 gramos.

Si Albiar midugang nga ilang nahibaw-an nga si Demetrio usa sa mga sinaligan sa usa ka dakong drug lord nga ila nang nadakpan sa mga miaging operasyon. (IBM) (BANAT NEWS)