Wellington Lim gi-ambush?

CEBU, Philippines — Naghimo karon og lawom nga imbestigasyon ang kapolisan pagtino kon ang negosyanteng si Wellington Lim, igsuon ni Peter Lim nga usa sa mga gipangalanan ni Pres. Duterte nga nalambigit sa ilegal nga drugas dinhi sa nasud ang target sa  pagpamanhig kagahapon sa kaadlawon.

Ang kapolisan miklaro nga wala pay nakasiguro kon si Wellington maoy target sa mga armadong sakay og pickup ug mirakrak sa sakyanan diha sa atubangan sa New Cebu Infinity KTV and Music Lounge sa Archbishop Reyes Avenue. Ang maong bar gipanag-iya ni Wellington.

Atol sa pagpangrakrak namatay ang gwardiya sa bar nga si Wilson Bucay, samtang naangol ang kauban niining gwardiya nga si George Lambating,52.

Apan napagan ang duha ka German nationals nga silang Pauline Basbach, 20 ug Manuel Goerrings, 24, pulos taga Bergisch Gladbach, Germany nga naagi sa lugar ug nangapagan.

Ang duha ka gwardiya giingong nag-man sa traffic sa paggawas sa sakyanan nga gituohang giluwanan ni Wellington dihang nahitabo ang pagpangrakrak.

Si Senior Police Officer 3 Wetzel Berry, imbestigador sa Homicide Section sa Cebu City Police Office miingon nga tulo ka klaseng armas ang gigamit sa pagpamanhig. May nakuha nga 55 ka mga basiyo sa bala sa M16 ug upat ka bala niini ang nakuha sa crime scene.

Si Berry nagkanayon  wala pa silay kompirmasyon kung si Wellington ba ang sakay sa sakyanan nga girakrakan tungod kay way mga tawo sa bar ang nitug-an.

Nabulit sa bala ang sakyanan nga bulletproof ug ang sakay niini nakapadagan padulong sa IT Park ug wala na igkita sa mga mirespondeng polis. Susihon pa sa kapolisan ang mga CCTV cameras sa lugar tungod kay atol sa insidente wala mag function ang CCTV sa bar.

Si Konsehal Dave Tumulak, nitug-an makig-alayon sila sa Land Transportation Office kung kinsa gyud ang tag-iya sa sakyanan nga girakrakan.

Matud niya naalarma na sila karon sa mga pagpamatay ug ilang giawhag ang kapulisan nga tutukan kining mga kasoha ug giawhag niya ang katawhan nga makig-alayon sa iyang buhatan ug sa kapulisan kon duna silay impormasyon.

Sa iyang bahin, ang direktor sa CCPO nga si Senior Superintendent Joel Doria mihimakak nga si Wellington ang target sa mga mamumuno sanglit wala  modangop kanila human sa hitabo ug way ebidensya bahin niini ang impormasyon.

Si Doria miingon nga kung kinsa man gani ang namanhig aduna gyud kini “intent to kill” kay nakapagan kini og upat ka tawo. Nakit-an ang Ford Expedition nga midagan padulong sa usa ka condominium sa IT Park, Barangay Apas apan wala na makita kon kinsa ang sakay niini.

Sigon pa ni PO2 Marlito Caedet sa Cebu City Crime Laboratory ilaha pang susihon ang maong sakyanan.

Si Doria miingon nga aduna nay pulis nakig-estorya sa tagdumala sa condominium aron matino kon kinsa ang biktima nga naparking sa ilang lote, wala tugoti ang mga polis pagsud sa condominium.

Wala mibati og kainsulto si Doria nga wala moduol kanila ang biktimang gibanhigan.

“Hindi naman kami nainsulto, at saka hindi naman unusual na tatakbo ang biktima may cases na ganun, na ayaw nila magpaimbestiga. And we let them, karapatan na man nila,” si Doria miingon.

Si Cebu City Mayor Tomas Osmeña miingon nga duna nay pattern nga iyang nakita sa mga nahitabo karong sagunson nga mga pagpatay. Matud niya wala na gyuy kahadlok ang mga kriminal.

“I don’t know what to say. Except criminals now are not afraid anymore. They will do what they want to do anymore. There’s no fear. It’s scary,” sigon sa mayor.

Sumala pa niya gisalig niya ang tanan sa kapolisan apan kon di na makontrolar ang sitwasyon manginlabot na siya. (IBM) (BANAT NEWS)