BM adlawan nitaliwan na

CEBU, Philippines — Nitaliwan na ang 56-anyos nga bise mayor sa Lungsod sa Asturias nga si Allan Adlawan, kinsa kanhi sab mayor sa tulo ka termino, tungod sa lung cancer pasado alas 2 kagahapon sa kaadlawon.

Si Mayor Jose Antonio Pintor nagkanayon nga namatay si Adlawan sulod sa pribadong tambalanan sa Dakbayan sa Sugbo diin siya na-admit niadtong Lunes.

Si Pintor nagkanayon nga nadiskubrehan ni Adlawan nga aduna siya’y sakit sa baga niadtong Hunyo 2017.

"Duna toy bugon nga nigawas sa iyang liog iyang gipahikap nako kalit kaayo," matud ni Pintor.

Nasuta nga benign kini apan nangayo og second opinion si Adlawan sa laing tambalanan ug nasayran nga stage 4 cancer na.

Si Adlawan nisulod sa politika niadtong tuig 2001 isip konsehal sa Lungsod sa Balamban.

Niadtong 2007 nahimo siyang mayor sa Asturias hangtud 2016 ug nahimo na sab siya nga bise mayor nunot sa pagkahuman sa iyang tulo ka termino ug nipuli kaniya si Pintor ubos sa One Cebu Party.

Si Pintor nagkanayon nga dako nga kawad-on sa Asturias ang pagtaliwan ni Adlawan kinsa matud pa maoy naninguha nga molambo ang lungsod.

Si Bise Gobernador Agnes Magpale nipadayag sa iyang pahasubo sa kamatayon sa bise mayor bisan dili sila kaalyado sa politika apan pareho silang nanerbisyo. (GMR) (BANAT NEWS)