Brgy. Sambag 1 na sab ang gi-drug test
CEBU, Philippines — Gipaubos ang mga empleyado sa Barangay Sambag 1 sa surprise drug test sa Cebu City Office for Substance Abuse Prevention (COSAP) kagahapon.
Kini ang ika-lima nga barangay ang napaubos sa COSAP sa surprise drug test human sa Barangay Kasambagan, Day-as, Pamutan, Sambag 1 ug Guadalupe diin dunay unom ka kawani nga nagpositibo.
Si Sambag 1 Barangay Kapitan Lemar Alcover niingon nga bintaha gyud ang drug test tungod kay malimpyuhan nila ang ilang palibot ilabi na karon nga gihingusgan ang kampaniya batok sa ginadiling drugas.
“Usa sad na nga dako’g epekto ba kay mauwawan ta sige tag kampaniya sa drugas nya sa atong palibot naa diay mga adik-adik,” matud ni Alcover.
Matud sa kapitan nga duna sila’y dul-an 100 ka empleyado apan dili tanan ang napaubos sa drug test tungod kay duna sila’y mga empleyado nga wala mahibawo niini ug naa sa field.
Hinoon ang wala na-drug test kagahapon paadtuon sa buhatan sa COSAP.
Kadtong mga magpositibo human sa confirmatory test sa resulta ang taktakon sa trabaho. (GMR) (BANAT NEWS)
- Latest
