Tulo nga gipatay hitmen?

CEBU, Philippines — Bag-o pang nakagawas sa Lapu-Lapu City Jail ang usa sa tulo nga gipamusil sa riding-in-tandem sa  dumpsite sa  Sitio Soong, Barangay Mactan, Dakbayan sa Lapu-Lapu alas- 7 pasado ang takna sa miaging gabii.

Senior Police Officer 3  Allan Pantaleon sa Homicide Section sa Lapu-Lapu City Police Office (LLCPO) miila sa biktima nga pipila pa lang ka gutlo nga nakagawas sa Lapu-Lapu City Jail mao si Rino Nelibo Igus, 39, taga Barangay Mactan sa maong dakbayan.

Samtang  giila sa mga kabanay kagahapon sa buntag ang laing duha  ka mga biktima nga mao sila si  Orbel Inihao, 39, taga Marigondon ug Zaldy Dungog, 31,  taga Canjulao sa maong dakbayan.

Si Wenie Bercede, branch manager sa Sure Life Funeral Homes, Lapu-Lapu Branch nga nahinabi sa Banat News miingon nga ang mga sakop sa pamilya sa duha maoy nag-ila kanila.

Si Pantaleon miingon nga ang duha maoy nisugat kang Igus nga bag-o pang migawas sa LLCJ nianang higayona tungod sa kaso niini sa ilegal nga drugas.

Napalgan sa crime scene ang 40 ka mga basiyo sa bala .9mm ug kalibre .45 nga armas nga gituohang gikan sa armas sa mga mamumuno.

Ang mga biktima pulos armado, giingong nagluklok sila pareho og 9mm pistol, usa ka.45 kalibre pistol ug .357 magnum nga pulos puno og bala. Sukwahi kini sa unang na-report nga duha ka kalibre 45 ug usa ka 38 kalibre.

Si Pantaleon miingon nga ilegal nga drugas ang nag-una nilang gisusi nga motibo sa maong pagpatay.

Si Police Regional Office-7 Director Chief Supt. Robert Quenery mibutyag nga aduna sila’y nadawat nga impormasyon nga mga hitman ang tulo ug plano nilang panimaslan ang polis nga nakadakop kanila.

Matud ni Quenery nga mga “isolated cases” lang kining tanang nahitabong mga pagpatay dinhi sa Sugbo.

Gani, sa bag-ong datos sa Police Regional Office-7, sa buwan sa  Enero hangtod Marso sa tuig 2017 niabot na og 170 ka kaso sa murder ug 32 sa homicide ang natala. Karong tuiga sa susamang mga buwana, aduna ray 135 ka mga murder cases ug 33 ka homicides.

Apan si Bise Gobernador Agnes Magpale nabalaka na niining sagunson nga pagpatay ug apil sa mga biktima opisyal sa gobiyerno.

“Alarming gyud, pila na ka konsehal unya work related. It scares me baya.  Kay kung work related lang kadaghan na nako napapriso,” matud  ni Magpale.

Si Magpale nakadawat na og “death threats” kaniadto tungod sa ilang operasyon sa Provincial Women’s Commission (PWC)  batok sa mga nalambigit sa human trafficking ug pag-abuso sa mga kababayen-an ug kabataan. (IBM) (BANAT NEWS)