Vendors sa Tabunok makasulod na sa merkado
CEBU, Philippines — Ang mga manindahay diha sa Barangay Tabunok, dakbayan sa Talisay mahimo na kining makabalhin diha sa bag-ong merkado matud ni Engineer Julius Cabunillas sa Tuanson Construction.
Matud ni Cabunillas nga ang ilang gitrabaho mao na lang ang cladding o sumpay sa canopy sa merkado aron dili mosalibo. Giingong inig sulod sa mga manindahay sa merkado makasugod na usab sila sa pagtrabaho sa elevated nga parkingan sa maong merkado.
Matud usab ni Tuanson nga sa pagkakaron dili sila makasugod og trabaho sa parkingan tungod kay mabalda sila sa mga manindahay kinsa temporaryong namaligya diha sa lugar.
Samtang si City Engineer Gamaliel Vicente, Jr. sa dakbayan sa Talisay niingon nga bag-o lang nila giinspeksiyon ang trabaho sa kontraktor diin nakauyon sila niini.
Wala na siya mabalaka sa tinguha sa mayor nga pasudlan na gyud sa manindahay ang merkado karong Marso 26 dungan sa kasaulogan sa Takas sa Talisay o Talisay Landing.
Matud niya nga naa na sa komitiba sa merkado sa Tabunok ang pagpahiluna sa mga manindahay.
Gisuroy usab sa engineering office ang Technical Vocational School nga gipahimo ni Mayor Eduardo Gullas didto sa merkado sa Lagtang.
Si Vicente nagkanayon nga lakip kini sa mga inagurahan sa mayor karong adlaw nga Lunes. (BDB) (BANAT NEWS)
- Latest
