Kapitolyo mihangyo og lugway sa security agencies

CEBU, Philippines — Ang kagamhanan sa probinsiya mihangyo  nga malugwayan og usa ka buwan ang serbisyo sa duha  ka security agency diha sa Kapitolyo samtang wala pa’y napili nga security agency  nga mobantay diha sa  mga buhatan sa probinsiya.

Anaa na karon sa post qualification nga stage ang Bids and Awards Committee (BAC) sa Kapitolyo pagpili sa duha ka security agency nga mobantay sa tanang buhatan sa probinsiya sa Sugbo.

Si Jon Sepe miyembro sa BAC nagkanayon nga niadtong Marso 14, 2018 nagbukas sila sa bidding alang sa security agency.

Ang Tactical Security Services ug GDS Security and Detective Agency mao ra ang niapil sa bidding o nagpapili.

Ang duha ka security agency mao kini ang kasamtangang nagbantay diha sa mga buhatan sa probinsiya.  Ang mga gwardiya sa Tactical mao’y nagbantay sa mga buhatan sa amihanan samtang ang GDS maoy nagbantay sa habagatang bahin nga buhatan nga gilangkuban sa Cebu South Bus Terminal ug Larsian.

Matud ni Sepe ang Tactical ug GDS Security Agency ilang gi-post qualify ug naglaom sila nga mahuman na niining buwana ang post qualification aron ma-award na nila kini.

Sa pagkakaron ang Kapitolyo mihangyo kini daan og usa ka buwan nga extension gikan sa duha ka security agency.

Ang kontrata sa duha ka security provider mo-expire kini karong buwan sa Abril niining tuiga.

Sumala ni Sepe nga ang Kapitolyo mogahin kini og P25 milyones sa matag security agency matag tuig gikan sa kapin P19 milyones niadtong tuig 2014.

“Ni increase ta karon gamay for the reason nga duna ta’y additional facilities nga bantayan and naa pod facilities nga gi-increase nato ang number of personnel”, matud ni Sepe.

Gibutyag ni Sepe nga natagbaw ra sila sa performance sa duha ka security provider sulod sa pila katuig nga serbisyo niini.

Kahinumduman nga niadtong tuig 2014, nakontrobersiyal ang pagpili sa security provider sa Kapitolyo human nga ang mga gwardiya sa una niining napilian nga security agency ang  Black Pearl Security Agency nakapusil og habal-habal driver diha sa property nga gipanag-iya sa probinsiya nga nahimutang sa Barangay Apas, dakbayan sa Sugbo. (BDB) (BANAT NEWS)