Driver, laing 3 sikop sa buy-bust

CEBU, Philippines — Walay swerte ang 33-anyos nga tricycle driver human nasikop sa buy-bust operation sa kapolisan sa Lungsod sa Minglanilla niadtong Miyerkules sa hapon sa may Lower Pakigne.

Ang nasikop mao si Raymond Aranas, residente sa maong lugar, kinsa matud pa ni Police Officer 3 Nikki Carlo Plarizan nga nakadawat sila og impormasyon may kalabutan sa ilegal nga kalihukan sa maong driver.

Nasakmit gikan kang Aranas ang pitaka nga sudlanan sa sinsilyo nga adunay dili mominus napulo ka gagmay nga putos sa shabu, buy-bust money ug P300 sa gituohang halin. Sa laing bahin, tulo ka tawo kinsa usa niini babaye ang nasikop human nakuhaan og ginadiling drugas sa Sitio Hawod, Bulacao, Dakbayan sa Talisay niadtong Miyerkules sa gabii.

Target sa operasyon si Ryan Clifford Bacus alyas Opaw, hingkod, kinsa nasikop gyud ug nakuhaan og 70 ka gagmay nga pakete sa shabu nga balor og P55 mil.

Gawas kang Bacus nasikop sab si Radys Ibones alyas Gladys, 22, taga Mananga 1, Tabunok dihang naatlan nga nipalit og drugas.

Nakuha gikan kaniya ang 20 ka gagmay nga pakete sa shabu nga balor og P10,000.

Laing nasikop kay nipalit og drugas mao si Joepit Cabriana, 30, nga nagpuyo sa maong dapit, kinsa nakuhaan og 15 ka gagmay nga pakete sa shabu nga balor og P7,500. (Rowena D. Capistrano, Gabriel C. Bonjoc ug Felix Junjun Cebel, BC Intern/GMR) (BANAT NEWS)