Tulo gipamusil patay

CEBU, Philippines — Tulo ka mga lalaking luwan og motorsiklo ang kalit nga gipamusil sa laing duha ka lalaking riding-in-tandem diha sa dumpsite sa Sitio Soong, Barangay Mactan sa Dakbayan sa Lapu-Lapu kagabii.

Matud pa ni Senior Police Officer 2 Lorgina Sayson,  desk Officer sa Mactan Police Station nakadawat sila og alarma bahin sa nahitabong pagpamusil diha sa maong dapit.

Sumala pa ni Sayson, blangko pa sila kon kinsa ang mga biktima kinsa dead on the spot sa lugar tungod sa mga samad pinusilan sa ilang kalawasan.

Si Chief Inspector Wayne Magbanua , hepe sa Mactan Police Station mibutyag sa The Freeman ug Banat News nga base sa inisyal nga imbestigasyon duha ka mga mamumuno nga nag-angkasay og motorsiklo ang mipusil sa tulo.

Sa pagsusi sa mga imbestigador armado ang mga biktima kay nagluklok ang duha og tagsa kalibre .45 ug ang usa may giluklok nga kalibre .38.

Matud pa nga walay nakaila sa maong mga biktima sa lugar ug wala pa usab masayri kon mag-unsa ang tulo sa maong lugar.

Niining pagsuwat padayon pa ang imbestigasyon sa maong insidente. (IBM) (BANAT NEWS)