Pang-gobiyerno maayo ra bisan wala si Aguirre

CEBU, Philippines — Nagkanayon si Cebu City Mayor Tomas Osmeña nga maayo ra ang dagan sa pang-gobiyerno kun wala si Justice Secretary Vitaliano Aguirre.

Kini human gibalita nga ang Department of Justice niusab sa dismissal sa drug-related charges nga gipasaka batok sa mga giingong drug lords nga sila si Peter Lim, Kerwin Espinosa ug kaubanan.

“Sakpan gyud, nabisto. That shows you they were wrong, we’ll be better off without Aguirre, that’s one thing for sure,” matud ni Osmeña.

Sayo niini si Aguirre nibahad nga mopasaka og kaso batok ni Osmeña human siya pasanginli og kurapsiyon sa pagpanginlabot niini sa mga kaso nga gisang-at sa kagamhanan sa siyudad batok sa mga dagkong establisemento.

Si Osmeña nipahibawo nga mopasaka sab og kasong disbarment batok kang Aguirre.

 Namahayag kaniadto ang mayor nga ang nasudnong kagamhanan angayan nga motabang sa mga local government units sa paggukod niadtong mga tax evaders.

Gihimug-atan ni Osmeña nga nihimo lang siya sa iyang trabaho sa pagprotehir sa mga Sugbuanon ingon man sa kaugmaon sa Sugbo. (GMR) (BANAT NEWS)