Mga inspectors nidalikyat sa motel
CEBU, Philippines — Nireklamo ang usa ka babaye nga kawani sa Talisay City Hall human siya gidala sa Queensland Motel sa iyang kaubang kawani human sa ilang sanitary inspection.
Gani sa iyang pasangil nihawok pa ang lalaki kaniya sa wala pa nisulod sa motel.
Ang babaye umagad sa opisyal sa siyudad apan buwag na sa bana samtang ang lalaki minyo ug hapit na moretiro sa trabaho.
Base sa affidavit sa babaye nga Marso 8 gitawag siya sa lalaki aron pahimuon og joint inspection ang Office of the Building Official (OBO) ug Sanitary alang sa quail raising farm sa Barangay Linao.
Nibiya ang duha alas 10 sa buntag sa ilang tagsatagsa ka buhatan sakay sa motorsiklo sa lalaki. Nitambong pa gyud sila og sesyon labot sa gireklamo nga himoanan og uling sa mao gihapon nga barangay.
Ang duha nisuroy sa ulingan dayon giingong nitanyag ang lalaki nga magpabugnaw ug maniudto apan ang babaye nipadayag nga wala siya’y kwarta ug gusto kining mobalik na lang sa City Hall.
Ang lalaki namugos nga moadto sila sa Queensland Motel mangaon samtang siya ang mobayad apan nibalibad ang babaye ug nakadesider nga adto na lang mangaon sa mall sa Barangay Lawaan 1.
Ang babaye niasoy nga samtang sila nanakay balik sa motorsiklo, nangawat pa gyud og hawok ang lalaki sa iyang aping apan iya kini nawakli.
Sa ilang pag-abot sa eskina niliko ang lalaki paingon sa motel bisan pa sa iyang paghangyo nga dili sila mosulod sa maong lugar.
Samtang nakig-estorya ang suspek sa room boy, ang babaye nanaug sa motorsiklo dayon gawas sa motel.
Tungod niini, gisunod siya sa lalaki ug gipasakay kay mamalik na lang sila sa ilang buhatan.
Ang babaye nideretso og sumbong sa iyang labaw nga si Dr. Lino Alanzado ug gisumbong sab dayun ngadto sa labaw sa lalaki nga si Engr. Gamaliel Vicente Jr.
Si Emely Cabrera, pangulo sa Human Resource Department, niingon nga ilang palawman ang imbestigasyon sa Committee on Discipline and Investigation. (GMR) (BANAT NEWS)
- Latest
