Pag-clear sa 5 barangays gi-hold

CEBU, Philippines — Gipugngan una ang pagdeklarar sa lima ka barangay sa Lalawigan sa Sugbo nga "drug cleared barangay" sa Philippine Drug Enforcement Agency.

Kini human nasuta sa PDEA-7 nga aduna pay presensya sa high-value target sa maong barangay base sa ilang   monitoring.

Ang lima ka barangay apil kini sa 35 nga gi-endorso sa Cebu Provincial Anti-Drug Abuse Office (CPADAO) ngadto sa Anti-Drug Oversight Committee sa Kapitolyo.

Usa sa maong barangay ang gikan sa Lungsod sa Alegria, usa sa Dakbayan sa Danao, usa Lungsod sa Medellin ug duha ang sa Lungsod sa San Remigio.

Matud ni Ivy Durano-Meca, pangulo sa CPADAO, nga ang 30 ka barangay nga ila usab gi-endorso sa komitiba gipaabot nga madeklarar na sunod buwan human makapahigayon og on-site validation ang Department of Health pagsuta kun han-ay ba ang drug rehabilitation program sa maong mga barangay.

Kun kini madeklarar maapil kini sa unang 160 ka barangay nga gi-cleared na sa oversight committee.

Samtang giawhag usab sa Department of Interior and Local Government ang mga Barangay Anti-Drug Abuse Councils (BADAC) sa pagduso na sa ilang listahan sa drug personalities sa matag barangay diin ang deadline kagahapon ra unta.

Si Jerome Gonzales, provincial director sa DILG-Cebu, nagkanayon nga trabaho sa ilang buhatan mao ang pag-monitor ug pagseguro nga gihimo sa mga BADAC ang ilang trabaho pinaagi sa pagsumiter sa maong listahan.

Matud ni Meca nga usa sa trabaho sa mga BADAC ang pag-consolidate sa listahan sa mga pangan sa drug personalities sa ilang mga barangay ug iduso ngadto sa buhatan sa kapolisan aron ma-validate ug ma-monitor alang sa ipahigayon nga Oplan Tokhang. (GMR) (BANAT NEWS)