Honorarium sa tanod cash card na
CEBU, Philippines — Nakadawat na sa ilang cash card ang mga tanod sa barangay sa Siyudad sa Sugbo diin ang Cebu City Office for Substance Abuse Prevention (COSAP) ang nagpahigayon.
Nagkanayon ang pangulo sa COSAP, Garry Lao, nga 577 ka tanod gikan sa 32 ka barangay ang gipanghatagan og cash card isip unang hugna.
Kini gilangkuban sa Bonbon, San Antonio, Guadalupe, Luz, Sudlon II, Labangon, Binaliw, Hipodromo, Cambinocot, Paril, Cogon Ramos, Bulacao, Kamagayan, Punta Princesa, Banilad, Pit-os, Apas, Buot, Sudlon I, Pahina-San Nicolas, Tejero, Tabunan, Sinsin, Babag, Sawang Calero, Pung-ol Sibugay, Budla-an, Pulangbato, Quiot, Talamban, Adlaon ug Sta. Cruz.
Ang cash card mao na ang gamiton sa pagkobra sa ilang honorarium sa bangko ug dili na moadto sa City Hall.
Ang mga tanod nagdawatan og P4,000 nga honorarium gikan sa City Hall.
Gihulagway ni Lao nga “hassle-free” ang cash card ug dili na sab mabalaka nga dili makakuha sa honorarium tungod kay naa naman kini sa ilang ATM card. Gawas sa mga tanod giplanohan sab nga manghatag og cash card sa ubang mga empleyado nga nagdawatan og honoraria gikan sa kagamhanan sa siyudad. (GMR) (BANAT NEWS)
- Latest