Giaway sa asawa, bana naghikog
CEBU, Philippines — Patay ang usa tawo nga giingong nagguol nga giaway sa iyang asawa tungod kay nanghuwam kini og kwarta nga gihurot lang og pilde sa sugal nga mahjong sa Soccoro Village, Dapitan, Lungsod sa Cordova diin alas 6 sa buntag na kagahapon nadiskubrehan.
Si Senior Police Officer 1 Laurencio Wagwag sa Cordova Police Station niila sa namatay nga si Nickelugan Igot, 41-anyos, nagpuyo sa maong dapit.
Matud ni Wagwag nga ang asawa sa namatay maoy nakadiskubre sa patay’ng lawas sa iyang bana nga nagbitay na sa sulod sa lawak sa ilang panimalay pinaagi sa paghigut og pisi nga nylon sa liog nga ang pikas tumoy gihigut sa ibabaw nga bahin sa kisame.
Si Wagwag niingon nga ang asawa sa ilang pagsukit-sukit nitug-an nga nahitabo ang ilang panag-away sa hapon sa niaging adlaw human nasayri nga nanghuwam kini og kwarta sa ilang silingan apan gihurot lang og pilde sa mahjong.
Dugang pa ni Wagwag nga nagtuo ang asawa nga na-depress ang iyang bana sa ilang panag-away hinungdan nga nakahukom sa paghikog.
Hinuon si Wagwag niingon nga ilang giawhag ang mga sakop sa pamilya sa pagpaubos sa autopsy sa patay’ng lawas sa pagsuta kun may foul play ba o wala ang kamatayon niini. (GMR) (BANAT NEWS)
- Latest