Babaye nihimakak sa sunog sa ilang balay

CEBU, Philippines — Hugtanong gihimakak ni Jenny Paran nga siya ang hinungdan sa sunog nga niulbo Lunes sa gabii sa Ward 3 Poblacion, Minglanilla.

Matud ni Paran nga gipasanginlan lang siya ug dili gyud siya maoy nagsunog tungod kay nilakaw siya atol sa pagkasunog sa ilang balay.

Sumala pa ni Paran nga dako ang iyang pagtuo nga charger nga nibuto ang hinungdan sa sunog tungod kay gubaon kini nga naka-charge.

Dugang pa ni Paran nga kung siya pa ang nagsunog dili na siya mobalik sa agi aron tan-awon ang ilang balay.

Awhag ni Paran nga dili lang siya prisohon tungod kay inosente siya sa maong panghitabo ug aduna usab siya sakit nga gihambin.

Apan ang kapolisan sa Minglanilla temporaryo una nga nitanggong kang Paran tungod kay ipaubos pa kini sa imbestigasyon ilabi na nga gitumbok kini sa mga residente nga nanganting sunogon ang ilang balay atol sa panag-away nila sa iyang bana.

Nikabat sa 25 ka panimalay ang hingpit nga naugdaw ug adunay partial nga nakan-an nga moabot sa P1.5 milyones ang gibilin nga danyos. (Rowena D. Capistrano/GMR)

Mga kawani sa Brgy Guadalupe gi-drug test

Gipaubos sa surprise drug test ang kapin 200 ka empleyado sa Barangay Guadalupe nga gipahigayon sa Cebu City Office for Substance Abuse Prevention kagahapon.

Nagkanayon ang pangulo sa COSAP, Garry Lao, nga subay kini sa hangyo ni Barangay Kapitan Michael Gacasan.

Ang Barangay Guadalupe adunay 280 ka empleyado apan atol sa drug test dunay walo ka empleyado ug usa ka konsehal ang wala.

Apan matud ni Lao nga ipatawag gihapon ang wala napaubos sa drug test.

Karong tuiga upat na ka barangay ang napaubos sa surprise drug test nga mao ang Kasambagan, Day-as, Pamutan ug Guadalupe.

Sigun ni Lao nga importante nga ang mga empleyado sa barangay mapaubos sa drug test tungod kay gusto nila nga limpyo ang mga tawo nga naa diha.

“Kay kulismaot kaayo tan-awon nga sige tag kompaniya sa atong gawas unya sa sulod sa atong panimalay naa diay tiggamitan,” matud ni Lao.

Resulta sa maong drug test mahibaw-an sulod niining semanaha kun may magpositibo ba o wala.

Si Gacasan niingon nga kun duna siya’y mga empleyado nga magpositibo mataktak gyud kini sa trabaho.

Hinoon ang maong empleyado mahimong mopaubos sa rehabilitation program sa siyudad ug kun makita nga nagbag-o sila pwede silang dawaton pagbalik kung dunay bakante.

“Ang ni-absent atong ipatawag sila niya human dad-on nako mismo ngadto sa COSAP special drug test sila kung dili gyud sila motunga dili sila pa drug test consider positive gyud sila,” matud ni Gacasan. (GMR) (BANAT NEWS)