Salisi gang miatake sa airport?

CEBU, Philippines — Usa ka ginang ang nasagmuyo ug giingong dili na kini ganahang mobalik pa nganhi sa Sugbo human mawagtangi sa iyang bag diha sulod sa Mactan Cebu International Airport niadtong Biyernes sa udto.

Ang biktima giila nga si Christina Lau, taga Pasay, Manila giingong nabiktima sa salisi gang mibutyag nga wala na gyud niya makita pa ang iyang mahalon nga bag diin duna kini sulod nga mga alahas, kwarta ug cellphone.

Usa sa nasagmuyoan ni Lau tungod kay giingong wala siya hatagi og kahigayonan nga makakita sa close circuit television (CCTV) camera aron makita kong kinsa ang mikuha sa iyang bag.

Gibutyag ni Lau nga nisiyagit siya sa dihang nabatyagan niya nga nawala ang iyang bag ug migawas siya aron pangitaon ang posibleng nagbitbit niini apan wala niya kini makita.

Matud ni Lau nga nibalik siya og sulod sa airport apan dili unta siya pasudlon sa security personnel hinungdan nga niinsister siya nga nawala ang iyang butang ug gidala siya ngadto sa information center.

Giingong si Lau nihangyo nga mosusi sa CCTV camera ug niabot na lang og usa ka oras giingnan lang siya sa personnel nga paadtuon na lang sa hotel ug hatagan na lang siya og update.

Apan hangtud sa oras niining pagsuwat sa balita wala pa siya’y nadawat nga feedback kong unsa na’y nahitabo sa nawala kaniya nga butang nga mobalor tanan og P500 mil.

Sa kasagmuyo ni Lau mipadayag kini nga dili na siya ganahang mobalik nganhi sa Sugbo tungod sa nahitabo kaniya diha sulod sa airport.

Ang Banat News misuway og kuha sa habig kang Avigael Maningo, corporate communications manager sa GMCAC apan hangtud sa oras sa pagsuwat niining balita wala kini mohatag og pamahayag. (BANAT NEWS)