Litrato sa kinabuhi ni Chang

CEBU, Philippines — Kinahanglan matod pa nga magtinarong kita sa atong kinabuhi ug batunan nato ang saktong paminsar kay mao kini ang magtuboy kanato sa kalamposan. Giisip niya nga usa sa naghulma sa iyang pagkatawo mao ang iyang kasinatian sa public service nga giisip niyang dako og importansiya sa iyang kinabuhi.

Kini matod pa ni Neil June Euldan o mas nailhan sa kadaghanan isip “Chang”, 26 anyos ug kinsa barangay councilor sa Luyang, Carmen, Cebu.

Gawas sa iyang trabaho isip barangay councilor, ilado sab siya isip professional photographer diin siya mao ang official photographer sa Sinulog Festival sulod na sa tulo ka tuig, Asia’s Next Top Model Cycle 3, Queen of Cebu, ug official photographer sa presidential son Sebastian Duterte.

Ikatulo si Chang sa tulo ka managsuon. Magtumod og nilung-ag nga saging ang iyang inahan ug jeepney driver sab iyang amahan.

Gipaambit sab niini nga kasagran nilang sud-an mao ang isda kay mao ra man ang makaya og palit sa iyang mga ginkanan.  Walay hikay sa higayon nga sumad sa iyang adlaw’ng natawhan.

“Wala ko kasuway anang hikayan ko. Masuya gyud ko sa una sa akong mga kaila nga mga bata,”tug-an pa niya sa Banat News Tingusbawan.

Nagtungha siya sa Luyang Elementary School diin usa ka kilometro iyang baktason matag adlaw.

“P2 akong balon sa una. Masuya ko’s akong mga classmates sa una kay naa sila’y nindot nga mga erasers niya ako wala,”sigon pa niini.

Apan bisan pa man sa kawad-on, naningkamot gyud si Chang nga makalampos sa elementarya ug nipadayon og tungha sa Carmen National High School.

Nahimo siyang first year representative sa Supreme Student Government sa high school  ug mao kini ang giisip niyang sinugdanan sa iyang laraw isip public servant.

“Diha nag-start akong leadership ug public service. Kung naay mamatay nga parents sa mga studyante kay mangolekta ko’g hinabang taga room,”paambit pa niya.

Apan naundang siya sa third year tungod sa sige niya og pangita og kapangwartahan sama sa pag-apil og organize sa mga kalihokan sa fiesta sa ilang munisipalidad.

“Motabang ko’g facilitate sa mga nightly activities sa maghinangat ang fiesta, ug makakwarta gyud ko ato,”niya pa.

Kay daghan naman siya og absent, mauwaw na siya mobalik og tungha ug hangtod maundang na lang siya. Magpaabot na lang siya og sunod school year para motungha og balik.

“Moapil pud ko’g sayaw. Para di masuko si mama nga sige ko’g absent, ibutang nako sa ilawom sa lamesa akong trophy ug sobre nga naay note nga—palit ni’g bugas, ma,”hinumduma pa niya.

Tulo gyud ka tuig nga nagbalik-balik sa third year si Chang apan sa fourth year kay wala gihapon siya niundang pagpangita og sideline.

“Naningkamot gyud ko pag-fourth year nga makakita og bisan asa nga sideline kay nauwaw nako nilang mama ba nga sige’g bayad sa eskwelahan unya moundang ra ko,”niya pa.

Wala na nagdahom si Chang nga makapasar sa fourth year kay lagi sige man siya’g palta, apan iyang inahan kay nagtuo nga makapaso siya.

“Nagtubod akong luha samtang nagsakay me og bus ni mama padulong sa Cebu City kay iya kung palitan og sinena kay mo-graduate lagi daw ko,”asoy pa niya.

Miangkon sab siya nga nisuway siya og hikog.

“Niabot gyud ang time nga maghikog na unta ko kay nauwaw na gyud ko ba, wa ko niapil og practice kay feel nako hagbong lagi ko,”niya pa.

Apan nakugang si Chang sa dihang adunay usa ka klasmet niya nga niadto sa ilahang panimalay ug nihatod og programa sa graduation ug toga.

“Nakahilak gyud ko pagkahibalo,” sigon pa niini kinsa gibati og tumang kalipay nga nakalampos na gyud siya sa high school.

Nagtungha dayon sa kolehiyo si Chang sa University of Cebu- Main Campus ug nikuha sa kursong BSED English. Iyang inahan maoy nagbayad sa iyang matrikula. Gibutyag niini nga sa first year pa siya kay nakauyab siya sa iya ra sab nga klasmet  nga si Sky. Nabuntis si Sky hinungdan nga naminyo sila og ahat bisan pa man sa kabata pa niya. “Sa college daghan kaayo ko’g lisod nga naagian, 18 years old pa ko unya amahan nako unya nag-eskwela pa,” niya pa.

Human sa usa ka tuig, nibalhin siya sa Cebu Technological University og nikuha sa kursong BSHM apan wala ra sab siya nagdugay didto ug naundang human aduna sila’y wala gikasabotan sa iyang asawa.

Pag-edad niya og 21 anyos,  gihagad siya sa ilang barangay captain nga modagan pagka konsehal. Nagpanagana siya pagsugot apan nidagan gyud siya sa maong posisyon ug palaran nga nidaog.

“Dili ko ilado ato ha but nakadaog ko,”pasigarbo pa niini.

Nibalik siya og tungha sa UC apan BS-Political Science na iyang kurso.  Apan nibalhin ra sab siya sa University of San Jose Recoletos alang sa susamang kurso.

Sa kolehiyo, nagsugod na siya og sideline isip freelance photographer. Ang iyang kita maoy ibayad niya sa iyang matrikula. Wala matod pa siya natuno pagtungha sa iyang kurso tungod sa iyang trabaho.

Niadtong 2014, nagtukod siya og negosyo, ang Mr. Potato diin nipuhonan siya og P250,000. Dako matod pa siya og pasalamat ngadto ni Senorito Michelle Lhuillier kinsa nagtabang kaniya sa pagtukod sa maong negosyo.

Human sa walo ka tuig nga natanggong sa kolehiyo, nigradwar gyud siya niadtong 2017 sa USJR diin nalakip siya sa Outstanding Student Awardees.

Padayon nga nangalagad si Chang isip konsehal sa ilang barangay diin nadistino siyang Chairman sa Committee on Education.

“Naay time nga ang kwarta panggasto unta sa akong pamilya ako nalang ihatag sa akong constituents. I love serving people bahala’g ako wala,” ni Chang pa,  kinsa aduna na’y duha ka mga anak.

Aduna matod pay higayon nga ang katapusan niyang kwarta sa iyang pitaka ihatag niya sa himatyon nga konstituwenti. Maayo na lang nga nindot ang dagan sa iyang negosyo ug dagko sab siya og kita isip freelance photographer.

“I couldn’t perfectly imagine that I’ve been into politics at the very young age. I was molded by the people, I served the people, I made some lapses but I learned a lot,”niya pa.

Busa dako siya og pasalamat ngadto sa katawhan sa pagsalig nga gihatag ngadto kaniya.

“I would like to extend my heartfelt gratitude sa mga katawhan sa among barangay, who stayed with me in every obstacle, who prayed for my success, who believed to my power as a barangay leader. Your greatest trust is my biggest responsibility,”butyag pa niini. Dako pud siya og pasalamat ngadto sa Kahitas-an sa kaalam nga gisabwag nga mga grasya ngadto kaniya.

“I thank God for providing me such beautiful mind to fully grasp and understand everything,”ni Chang pa. Samtang giisip niyang sekreto sa iyang kalamposan isip konsehal ug in-demand photographer mao ang iyang pagkamapaubsanon.

“Dili man gud ko mapahitas-anon ug arogante. Better gyud nga magpaubos ra gyud ka ug i-treat nimo ang mga tawo nga parehas ra,” niya pa.

Busa mensahe niya: “Dili gyud na nato pangandoyon nga ma-successful ta, kusa na nga maabot kung nagtinarong ka sa imong kinabuhi ug sa imong paminsar. Dili ka magpadala sa imong problema. I don’t welcome negative thoughts.”