Nagbawon og shabu sikop
CEBU, Philippines — Nasikop sa checkpoint ang tulo ka motorista kinsa nagbawon og shabu sa ilang pagbiyahe sa nagkadaiyang mga dalan sa Dakbayan sa Mandaue alas 12 pasado niadtong Domingo sa gabii.
Si PO3 Frederick Andales sa Presinto 2 sa Mandaue City Police Office (MCPO) niila sa usa sa mga suspek nga si Rael Alvarez, 36, taga Cagayan de Oro City ug kasamtangan nga nagpuyo sa Umapad, Dakbayan sa Mandaue.
Matud ni Andales nga ang suspek nagdala og gamay nga pakete sa shabu nga gisulod sa plastic.
Samtang ang laing duha nga nadakpan sa checkpoint sa dalan Zuelleg sa Mandaue Reclamation Area mao sila si Junnel Prajes, 21, ug Raniño Relohado, 28, lumad nga taga Dakbayan sa Toledo ug kasamtangang nagpuyo sa Umapad sa maong dakbayan.
Si Senior Police Officer 3 Renato Canja niingon nga nahiagi ang duha nga nagsakay og motorsiklo sa checkpoint sa Presinto 1 sa MCPO ug dihang girekisa maoy nakuha ang duha ka paketeng shabu hinungdan nga sila gidakop.
Sa laing bahin, usa ka 53-anyos nga lalaki ang nasikop sa anti-illegal drug operations sa Canduloy, Tisa, Dakbayan sa Sugbo niadtong Sabado sa hapon.
Ang suspek nga si Raymond Cabreros ang nasakmitan og duha ka medium-size sa gituohang shabu nga balor og dul-an sa P120 mil, usa ka caliber .38 revolver nga adunay unom ka bala, ug usa ka home-made caliber .22 nga armas. (BANAT NEWS)
- Latest
