Drayber gipusil patay

CEBU, Philippines — Usa ka 30-anyos nga drayber sa habal-habal gibanhigan patay sa upat ka mga wala mailhing tawo sa usa ka tindahan diha sa Sitio Upper Torre, Barangay Inayawan, Dakbayan sa Sugbo kagahapon sa hapon.

Ang biktima giila sa Cebu City Police Office Homicide Section nga si Patricio Arsenal Jr., residente sa maong barangay.

Sumala pa sa imbestigador sa Homicide Section nga si SPO1 Winston Ybañez nga gisugo sa iyang asawa ang biktima aron nga mopalit og tubig.

Giingong duha ka Yamaha Mio nga motorsiklo nga puti ug itom nga adunay tagsa-tagsa ka mga angkas misunod sa biktima ug pag-abot sa maong tindahan ni U-turn ang maong mga motorsiklo paingon sa lugar gibarogan sa biktima.

Ang angkas sa itom nga motorsiklo maoy nanaog ug mipusil sa biktima lima ka higayon nga miresulta sa iyang kamatayon.

Nakuha sa crime scene ang pito ka mga kabhang sa kalibre .45 ug usa ka deformed slug sa maong bala.

Sa imbestigasyon, nasuta sa kapolisan nga may kalambigitan sa drugas kaniadto ang biktima.

“Ang giingon sa asawa kay manuyopay kuno ni pero hagbay rang niundang,” si Ybañez miingon.

Gibutyag usab ni Ybañez nga nakontra sa biktima ang iyang amo sa kaniadtong wala pa siya magdrayber sa habal-habal kay gibaligya ang pinalit nga motorsiklo sa iyang amo.

Matud pa ni Ybañez nga usa kini sa mga anggulo nga ilang tukion. (BANAT NEWS)