Naa sa watchlist gipatay
CEBU, Philippines — Patay ang usa ka 43-anyos nga lalaki human gibanhigan samtang sakay sa iyang awto diha sa Pope John Paul Avenue, Barangay Mabolo Dakbayan sa Sugbo kagahapon sa kaadlawon.
Ang gipatay mao si Warlito Colina, lumad nga taga Butuan ug temporaryong nagpuyo sa Dakbayan sa Sugbo. Samtang wala pa matumbok kinsa ang mga mamumuno.
Matud pa ni Senior Police officer 3 Joseph Din, imbestigador sa Homicide Section sa Cebu City Police Office base sa inisyal nga imbestigasyon pag-abot sa stop light nanigarilyo kini.
Apan pipila ka gutlo nadunggan sa mga tawo ang buto ug nitabok ang sakyanan sa biktima ug nibangga sa poste.
Gitug-an ni Din, blangko pa sila sa motibo sa pagpamusil apan subayon nila ang report nga naapil kini sa drug watchlist sa Mabolo Police Station. Ang biktima nakaangkon og samad pinusilan tulo ka higayon sa iyang nawong ug abaga.
Nasakmit gikan sa crime scene ang kwarta nga moabot og dul-an sa P35 mil, nagkadaiyang identification cards, armas nga adunay bala ug mga basiyo sa bala. Nakita sab nga adunay PNP sticker si Colina.
Samtang si Kapitan Rey Ompoc sa Barangay Mabolo nitug-an nga wala siya makaila sa biktima. (IBM) (BANAT NEWS)
- Latest