TCJ warden gihulipan sa iyang asawa

CEBU, Philippines — Pormal nang nanamilit ang warden sa Talisay City Jail nga si Superintendent Gil Inopia ngadto ni Mayor Eduardo Gullas kagahapon sa buntag.

Si Inopia ang hulipan sa iyahang asawa nga si Chief Inspector Mary Jane Inopia nga gikan sa rehiyonal nga buhatan sa Bureau of Jail Management and Penology (BJMP).

Matud ni Superintedent Inopia nga naabot ang kamanduan sa ilang labaw nga angay na siya nga mopaubos sa schooling ngadto sa kaulohan diin mao kini rekisitos sa pagpataas sa iyang ranggo.

Matud usab ni Superintendent Inopia nga ubay-ubay siya og nahimo sa TCJ diin ang maong prisohan nahimo kining kontrobersiyal gumikan sa iyang ka estrikto  nga pagpatuman sa seguridad.

Ug matag adlaw niya nga gipahigayon ang greyhound operation aron malimpiyo sa mga kontrabando ang sulod sa prisohan.

Ang TCJ ubos sa pagdumala ni Superintendent Inopia katulo ka  higayon kini nga gipaarakan.

Si Superintendent Inopia nakaserbisyo isip warden sa TCJ sulod sa siyam ka buwan ug mapasalamaton kini kang Gullas gumikan sa pagsanong sa mayor sa iyang mga hangyo aron mapalambo ang seguridad sa maong prisohan.

Sa iyang bahin, si Chief Inspector Inopia misaad nga maningkamot siya nga iyang mapadayon ang nasugdan nga gimbuhaton sa iyang bana alang sa kaayohan sa TCJ.

Ang babaye nga Inopia nahimo kining warden sa lungsod sa Consolacion, nahimong assistant warden sa Cebu City Jail sa minor dormitory ingon man female warden sa Cebu City Jail kaniadto.

Gibutyag niini nga bag-o kaniya ang mokupot og prisohan nga pulos lalake ang priso diin dunay kapin sa 500 ang gidaghanon sa inmate.

Samtang si Gullas sa iyang bahin usab, mipadayag sa iyang pagsalig sa babayeng Inopia ug mipasalig ang mayor nga sama sa bana niini nga kanhi warden ang iyang buhatan kanunay’ng bukas kong ugaling aduna kini mga hangyo. BDB (BANAT NEWS)