Ika-2 ug 6 sa ple gikan sa sugbo

CEBU, Philippines — Nasulod sa top 10 sa Physician Licensure Examination ang duha ka tinun-an sa Dakbayan sa Sugbo.

Usa niini si Dr. Jay Orehuela nga naa sa ikaduhang pwesto ug gradwado sa Matias Aznar Memorial College of Medicine, kinsa lumad nga taga Bohol ug nakakuha og average nga 88.17 percent.

Matud ni Dr. Ma. Socorro Manaloto, dean sa maong tunghaan, nga nagdahum na sila daan nga malakip si Orehuela sa top 10 tungod kay consistent scholar kini sukad pa sa first year ug kanunay nilang representante sa mga tigi sa sulod ug gawas sa tunghaan.

Sumala pa ni Manaloto nga nahagit sila karon sa paghatag og mas dugang kalidad nga edukasyon sa ilang mga medicine students aron magpabilin ang ilang taas nga percentage sa makapasar ug may mag-top sa ilang tunghaan.

Sa 158 nga nikuha sa pasulit sa unang higayon, 111 niini ang nakapasar.

Si Manaloto nitug-an nga isip pahalipay mohatag sila og incentive kang Orehuela.

Samtang ang 6th placer usab nagagikan sa Cebu Doctor’s University nga si Ommar Tampus Paculando nga nakakuha og 85.58 percent. GMR (BANAT NEWS)