Buhatan og armas gironda
CEBU, Philippines — Nasakmit sa kapolisan sa Carmen Police Station ug 703rd Maneuver Company, Regional Mobile Force 7 ang pipila ka ilegal nga armas atol sa pagpangronda sa usa ka ilegal nga firearm factory sa Barangay Corte, Carmen niadtong Lunes sa hapon.
Ang mga suspek giila nga sila si Ludivino Lumen ug ang duha ka anak niini nga sila si Noel Lumen ug Ranilo Lumen, mga hamtong ug nagpuyo sa maong lugar, kinsa nakasibat.
Mga nasakmit naglangkub sa unom ka upper receiver ug tulo ka barrel sa wala mailhing calibre sa pistola, duha ka magazine sa calibre .45 lakip na ang nagkadaiyang gamit sa paghimo og armas ug usa ka .22 rifle.
Samtang usa ka angkas sa motor ang nasikop samtang ang driver nakaikyas atol sa checkpoint sa mga sakop sa Regional Mobile Force Batallion sa Kamagayan, Perelos, Dakbayan sa Carcar.
Ang nasikop mao si Christian Chin, 36, taga Cogon, Valladolid sa maong dakbayan.
Matud ni PO2 Jomar Rey Villar, desk officer sa Carcar City Police Station nga padulong sa Perelos sila si Chin dihang nakakita sa checkpoint ug nisuway og eskapo apan nagunitan samtang ang driver dali nga nakaambak ug nikaratil og dagan.
Si Chin nakuhaan kini og calibre .45 nga may unom ka bala hinungdan nga kini nagtingkagol sa lock-up jail.
Dugang pa ni Villar nga ila gisusi ang record sa dinakpan ug asa usab gamiton ang armas nga gihuptan niini. - Leanne Mae D. Binag (BANAT NEWS)
- Latest
