Natagakan og trabahante gipahunong
CEBU, Philippines — Niluwat ang Department of Labor and Employment-7 og work stoppage order batok sa gitukod nga walo ka andana nga Philippine Macro Development Corporation sa Dakbayan sa Sugbo.
Kini human natagak ug namatay ang usa sa mga construction workers sa maong building.
Matud ni Luchel Taniza, information officer sa DOLE-7, nga ang WSO giluwatan niadtong Marso 2, 2018 ug padayon pa nga nagkorehir ang kompaniya sa mga labor law violations.
Base sa report sa DOLE-7 labor inspector nga nahitabo ang fatal accident alas 10:30 sa gabii niadtong Pebrero 27, 2018 diin ang biktima mao si Marino Telebrico.
Gimanduan sab ni DOLE-7 Director Cyril Ticao ang kompaniya nga ulian ang mga trabahante sa gikaltas nga bayad alang sa ilang Personal Protective Equipment tungod kay ilegal kini.
Nakita sab sa labor inspectors ang uban pang kalapasan sa kompaniya sama sa walay DOLE Accredited Safety Practitioner, wala pagpresentar sa accident report nga gamit ang prescribed form ug walay kongkretong lagda nga gipresentar aron sa paglikay sa samang hitabo.
“All noted deficiencies, indicated management’s laxity particularly in implementing the safety and health standards in the worksite, which exposed all workers to imminent danger conditions,” dugang pa ni Ticao. (BANAT NEWS)
- Latest
