Kaso nilang Peter Lim, Kerwin gibasura

CEBU, Philippines — Ang Department of Justice (DOJ) ni-abswelto sa giingong “kumpare” sa kasal ni Presidente Rodrigo Duterte nga mao ang Sugboanong negosyante nga si Peter Go Lim ug ang gipasanginlang drug lord nga si Kerwin Espinosa kalabot sa kalambigitan nila sa ilegal nga drugas tungod sa kahuyang sa ebidensya.

Sa report sa The Philippine Star (Philstar.com), base sa 51 ka pahina nga resolusyon pinetsahan og Disyembre 20, 2017  apan kagahapon lang gipagawas, gibasura sa state prosecutor ang kasong gipasaka sa Philipine National Police- Criminal Investigation and Detection Group batok ni Lim ug Espinosa ug 16 pa ka mga respondents.

Ang DOJ nagkanayon nga adunay “inconsistency” sa affidavits batok kanila ni Espinosa ug ni Lim.

“… Our law enforcement agencies shall gather more concrete and competent evidence proving that respondents and other individuals are indeed involved in illegal drugs activities, then there is no reason why they cannot file another case against them, but then again, they have to refrain from filing cases on the basis solely of an uncorroborated testimony of an evidently self-serving witness,” tipik sa desisyon sa DOJ panel.

Matud pa sa resolusyon, way nakasuportang ebidensya nga nalambigit sa maong illegal drug transactions ang mga gipasanginlan.

Ang maong resolusyon giaprubahan ni CP Jorge Catalan ang Acting Prosecutor General ug i- review pa sa Office of the Secretary of Justice.

Gawas ni Lim ug Espinosa gibasura usab ang mga kaso sa ubang respondents nga sila si Peter Co, Max Miro, Lovely Impal, Rule Malindangan, Jun Pepito, ug uban pa nga nailhan ra sa ilang mga alyas sama sa usa ka “Jermy”, “Ricky”, “Warren”, “Tupie”, “Jojo”, “Jaime”, “Yawa”, “Lapi”, “Royroy”, “Marlon” ug “Bay.”

Ang maong kaso gisang-at gibase sa testimonya ni Marcelo L. Adorco nga nadakpan niadtong Hulyo 8, 2016 kauban ang laing upat ka tawo atol sa buy-bust operation sa Albuera police.

Si Adorco giingong mikompisal  nga ang mga drugas ug mga armas nga nasakmit gikan kanila gikan ni “Daddy Onikk” nga mao si anhing Albuera Mayor Rolando Espinosa ug sa anak niining si Rolan Kerwin Espinosa.

Giingong mitug-an usab kini nga ang drug suppliers sa ilang grupo mao silang Peter Co, Peter Lim ug usa naila lang niya nga alyas Lovely.

Niadtong Agosto 4, 2016 miluwat og judicial affidavit si Adorco nga nagladlad kon giunsa ang paagi sa distribusyon sa shabu ubos sa Rehiyon 7 ug Rehiyon 8 diin mag-operate ang ilang grupo.

Tungod sa maong balita, gikalipay ni Lim ug sa iyang pamilya ang pagbasura sa DOJ sa maong kaso.

“Wala’y di malipay ana, in fact he was so excited about the result, and told us that once and for all the truth has set him free,” Dioscoro Fuentes Jr., mitug-an sa The FREEMAN igsuon pamantalaan sa Banat News sa interbyu kaniya sa telepono.

Si Lim daan nang mihimakak sa mga pasangil batok kaniya ug mipasangil nga hinimo-himo lang ang maong pasangil.

“We were able to show proof that on those dates, Peter Lim was hospitalized, because of his kidney failure,” sumala pang Fuentes.

Si PRO-7 director Chief Superintendent Robert Quenery miangkon nga nasagmuyo sila sa resulta apan misaad nga magpadayon sila sa pagpangaylap og mga ebidensya alang sa posibleng re-filing sa kaso. Ug report gikan sa The Freeman