Mga mayor pabor sa unified traffic system
CEBU, Philippines — Ang ubang mga mayor sa Metro Cebu pabor sa pag-unified sa traffic system sa probinsiya sa Sugbo alang sa kasulbaran sa kahuot sa trapiko diha sa kadalanan.
Ang hunta probinsiyal mipalabang og resolusyon nga gipangamahanan ni Bokal Thadeo Jovito Ouano kabahin sa maong traffic unification.
Ang maong plano giuyonan sa mga mayor kinsa mitambong atol sa gipahigayong meeting tali ni Presidente Rodrigo Duterte niadtong Pebrero 13, 2018.
Si Tuburan Mayor Democrito Diamante kinsa Presidente sa League of Cities and Municipalities of the Philippines (LCMP) Cebu Chapter nagkanayon nga ang problema sa trapiko dili lang kutob sa kalungsuran lakip na ang tibuok probinsiya sa Sugbo.
Si Ouano sa iyang bahin, nagkanayon nga angayan nga hatagan usab og pagtagad ang mga habal-habal diin edukahon sila sa pagsunod sa traffic rules alang sa siguridad sa mga pasahero.
Gituohan ni Ouano nga ang unified traffic system ang makasulbad sa kahuot sa trapiko diha sa mga siyudad ug kalungsuran. (BANAT NEWS)
- Latest