Priso gipatay sa kaubang priso

CEBU, Philippines — Patay ang usa ka piniriso human gibunalan ug gituok sa kaubang piniriso sulod sa Infirmary Ward sa Cebu Provincial Detention and Rehabilitation Center sa Kalunasan, Dakbayan sa Sugbo kagahapon sa kaadlawon. Ang namatay mao si Joebert Talabroso, 31, residente sa barangay Bato, Badian. Samtang ang gitumbok nga suspek mao si Ronel Birao, 31, taga Barangay Bato, Dakbayan sa Toledo.

Sigun pa sa imbestigador sa Homicide Section nga si SPO1 Winston Ybañez gibukbok ni Birao ang ulo sa natulog nga si Talabroso ginamit ang usa ka kahoy.

Nakita sab niini nga pagkahuman gibukbok gituok kini ginamit ang telephone wire nga dala ni Birao ug dihang wa na molihok ayha pa mibiya ang suspek.

Nakuha sa kapolisan sa crime scene ang usa ka 2x3 nga coco lumber ug ang 22 ka pulgadang telephone wire.

Butyag ni Ybañez nga puros kasong drugas ang giatubang sa duha parehong nangaangol kay nanukol atol sa buy bust operations sa kapolisan mao nga diretso sila sa infirmary ward sa CPDRC. Giingong si Talabroso na-inutil na ug gi-catheter na kini samtang si Birao gikatakdang operahan. (BANAT NEWS)