Rama ang isunod?

CEBU, Philippines — Daghan ang na-intriga kon kinsa ang nagbutang sa misteryusong tarpaulin diha sa skywalk sa Barangay Basak San Nicolas , Cebu City nga dunay hulagway sa abogado ni self-confess drug lord Kerwin Espinosa nga si Ronda Vice Mayor Jonnah John Ungab, Albuera, Leyte Mayor Rolando Espinosa nga amahan ni Kerwin ug kanhi mayor Michael Rama.

Ang motorista nga moagi ingon mga residente nga nagpuyo sa maong dapit naukay tungod sa maong tarpaulin diin ang mga hulagway nila ni Ungab ug Espinosa dunay marka nga “X” nga nagpasabot nga patay na sila ug kang Rama gilinginan ug gisuwatan nga “ikaw sunod.”

Si Ungab gipatay sayo ning semanaha human gidepensahan sa korte si Kerwin. Samtang si Espinosa gipatay didto sa sud sa prisohan sa Leyte sa miaging tuig 2016.

Sigon sa chief tanod sa Barangay Basak Pardo Henry Navarro, alas 6 kagahapon sa buntag dunay niadto  sa barangay hall ug nagpahibawo mahitungod sa tarpaulin.

Wala nuon sila masayod kun kinsa ang responsable   sa pagbutang sa maong tarpaulin.

Si Rama usa sa mga ginganlan ni Presidente Rodrigo Duterte nga matod pa drug protector, butang nga gihimakak niini ug hangtud karon gipaningkamotan niyang makahinabi og personal ang pangulo aron paglimpyo sa iyang pangalan. Nagtuo si Rama nga ang naghimo niini mga kontra niya sa politika ilabi na nga iyang gipahibawo nga modagan siya sa piniliay sunod tuig.

“Kinsa ‘tong maka-advantage nga maguba ko, mao na sila. Kinsa nagsige’g guba nako posible apil na sila. Sila nga hadlok kaayo nako kay wala sila kadaog nako apil sab na sila nga possibilities, so, all this are possibilities however, I wish them the best nga maka-accomplish sila sa ilang intensiyon nga paghadlok nako kay ako konsensiya ensakto makatug bisan sako ingon pa si Edgar Labella,” sigon ni Rama.

Si Rama miasoy nga wala ra siya’y nadawat nga mga death threats.

Ang maong insidente gikondenar sa mga kaalyado sa kanhi mayor sa Barug Team Rama nga sila si Association of Barangay Council (ABC) President ug Tisa Barangay Captain Phillip Zafra ug Konsehal Joel Garganera.

“So kung si kinsa man gani nagpaluyo ana murag naa gyuy ulod ang utok kay dili gyud na angayan sa usa ka civilized society,” asoy ni Zafra.

Samtang si Cebu City Mayor Tomas Osmeña mihimakak nga duna siya’y kalambigitan sa tarpaulin ug dili mahimong siya ray pasanginlan tungod kay mismo si Presidente Rodrigo Duterte maoy nisulti nga si Rama matod pa nalambigit sa drugas.

“Of course not, you know it the same thing with Rupinta, you know once you get involve with drugs you can have all kinds of enemies who did he double cross.

That’s what I suspect with Rupinta, ako naapil pa ko sa murder ni Rupinta which reminds me you tell them to give the guy P300 thousand reward why don’t you give it him if they really believe that I’m the master  and he said I’m the mastermind then give him the P300 thousand,” sigon ni Mayor Osmeña.

Sa pikas bahin, gihimug-atan sa Task Force Ungab nga ang kaluag sa seguridad sa Cebu City Hall of Justice sa Qimonda ang usa sa hinungdan nganong wala sila makakuha sa pangalan sa nasigpatang gituohang spotter sa CCTV footage nga nakuha gikan sa maong lugar.

Ang hepe sa Investigation, Detection and Management Branch (IDMB) nga si Police Supt. Ryan Devaras miingon nga wala diay maglista sa mga pangalan sa mga mosud sa maong edipisyo ang mga gwardiya.

Gipublikar na sa Task Force Ungab ang hulagway sa nasigpatang spotter ug motawag sa kapolisan kon makamay-ong sila niini pinaagi sa telepono (032) 266 5494.

Matud pa sa direktor sa CCPO nga si Senior Supt. Joel Doria nga kun ugaling coincidential lang o nasaypan ang nasigpatan tawo ug wa gyuy kalabotan sa maong krimen mahimo kining motahan kanila aron limpyohan ang pangalan.

Karong adlawa gikatakdang dalhon ang patay’ng lawas ni Jonnah gikan sa St. Peter Chapels pauli ngadto sa Ronda aron didto ihaya og usa ka gabii sa dili pa kini ilubong ugmang adlawa.— Camille Pateres (BANAT NEWS)