40 ka modernong jeep mobiyahe

CEBU, Philippines — Dili mominus 40 ka modernong public utility jeepneys ang magdagan na sa giilang missionary routes sa Siyudad sa Sugbo sa mosunod nga tulo ka buwan.

Kabahin kini sa nasudnong lakang sa gobiyerno nga hulipan na ang mga karaan nga sakyanan nga edad og 15-anyos pataas alang sa kaluwasan sa mga sumasakay.

Ang mga modern type nga sakyanan dunay global positioning system (GPS), wi-fi connection, curb side door, automatic fare system, dash cam ug low emission.

Nagkanayon ang director sa Land Transportation Franchising and Regulatory Board-7, Ahmed Cuizon, nga na-identify na nila ang duha ka missionary routes nga maghatag og serbisyo sa mga business process outsourcing (BPO) industries, City Hall workers, doctors ug uban pa.

Matud ni Cuizon nga kini ang gusto ni Mayor Tomas Osmeña nga hatagan og pagtagad.

Pasabot sa missionary routes, mao kini ang rota nga wala’y mga PUJs nga moagi sa dapit. Ang unang missionary route gikan sa Cebu City Hall gawas sa Plaza Independencia motuyok sa M.J Cuenco Avenue deretso sa dalan T. Padilla modemano sa may taytayan agi kilid sa Robinsons Galleria nga maoy first stop dayon mogawas sa General Maxilom Ave. agi atubangan sa Cebu City Health sa may Carreta liko sa gamay’ng eskina atbang sa karaan nga Sacred Heart School mosulod sa Cebu Business Park ug ang second stop mao ang PUV Terminal sa Ayala dayon molarga paingon sa Archbishop Reyes Ave. agi sa BIR modisilya sa TESDA paingon sa Salinas drive ug mosulod sa IT Park nga maoy final destination ug sa pagbalik mao ra gihapon nga rota.

Sa ikaduhang missionary route magsugod sa Banawa-Convergys agi sa Court of Appeals sa Happy Valley gawas sa V. Rama, mosulod sa B. Rodriguez ug ang first stop dapit sa may Fuente Osmeña Circle lahos sa Jones Avenue mosulod sa Arlington Pond agi sa Ramos Public Market motuyok sa D. Jakosalem Street mogawas atbang sa Iglesia ni Kristo lahos sa Gorordo Avenue paingon sa PUV Terminal sa Ayala ug ang final destination sa Sykes sa F. Cabahug Street.

Sa matag rota 20 ka units ang magdagan diin P15 ang minimum fare ug ang mga sundawo ug polis libre diin ang CITRASCO maoy mo-operate sa 40 ka units.

Naghuwat na lang sila sa approval sa Department of Transportation mahitungod sa proposed missionary routes.

Kagahapon, ang LTFRB-7 ug ang Cebu City Government nilusad sa PUJ Modernization Roadshow sa Plaza Sugbo.

Sa maong programa ang DOTr nitagana og loan facility alang sa mga PUJ operators nga wala’y igong capital aron pagpalit sa modernong PUJ.

Alang sa initial phase sa implementasyon, ang Development Bank of the Philippines nitagana og P1.5 billion nga pundo.

Ang mga PUJ operators mahimong makapalit og modern vehicles sa Hyundai, Isuzu, Tata Motors ug uban pa.

Sa iyang bahin, si Mayor Osmeña pabor sa modernization program sa nasudnong kagamhanan.

Hinoon, gihimug-atan niini hinay-hinayon kini sa pagpatuman aron paghatag og higayon sa mga PUJ operators nga maka-adjust. — Felix Junjun Cebel (BANAT NEWS)