“Spotter” pagbanhig nakuha sa CCTV

CEBU, Philippines — Suspek sa pagpamanhig patay kang Ronda Vice Mayor ug abogado nga si Atty. Jonnah John Ungab, napun-an na human masigpati sa CCTV ang usa ka gituohang ‘spotter’ pipila ka oras usa pa nahitabo ang maong pagpatay.

Butyag pa sa tigpamaba sa Task Force Ungab sa Cebu City Police Office nga si Senior Inspector Jonathan Taneo nga base sa usa sa tulo ka mga nakuhang CCTV footages, adunay kaestorya sa cellphone ang mamumuno pipila ka segundo usa gibanhigan ang maong abogado.

Sa pag-utingkay sa maong mga footage, nadiskobrehan nga aduna say laing lalaki sa sulod sab sa Qimonda nga daw naa say kaestorya sa cellphone ug naniid kon diin nang dapita ang sakyanan nga gimaneho sa biktima uban sa iyang asawa nga si Pearl Ungab.

Giingong daw nagtan-aw usab kini kon kinsa ang nagmaneho sa sakyanan sa maong biktima.

"Gikan siya sa luyo most probably iyang gitan-aw ang model ug ang plate number at the same time ni move siya forward most likely iyang gi-identify kon kinsa ang driver. All at the same time the gunman was outside holding also sa cellphone," si Taneo miingon.

Matud pa nga gisubay pa sab ang identification sa maong giingong spotter.

"Ato pa gitan-aw sa log book or documents mga gi log didto sa sulod sa building," si Taneo miingon.

Naglisod sila karon sanglit nagpanuko pang mohatag og dugang impormasyon ang nakasaksi sa maong panghitabo.

"Cooperative siya mosabay lang siya kung unsay i-question pero di gyud siya entirely mo-divulge. Hesitant pa siya," si Taneo miingon.

Niining pagsuwat, giangkon ni Taneo nga wala pa gihapon gihatag kanila ang cellphone sa biktima.

Nasayran nga niadtong Pebrero 19 gikan sa Cebu City Hall of Justice si Ungab uban sa iyang asawa gikan sa promulgation sa kaso sa kliyente niini nga si Kerwin Espinosa.

Apan sa paggawas nila sa gate gibanhigan kini sa usa ka lalaki  nga miresulta sa iyang kamatayon.

Atol sa press conference sa pamilyang Ungab niadtong Miyerkules buot nilang patutokan ang anggulo sa politika kay giingong may plano kining modagan pagkamayor.

Aron di na kini masubli, si Supreme Court Chief Justice Maria Lourdes Sereno mimando ni Regional Trial Court Cebu City Executive Judge Gilbert Moises nga papun-an ang seguridad sulod ug sa gawas sa Qimonda.

Sumala pa sa direktor sa CCPO nga si Senior Supt. Joel Doria nga gitutokan na sa mga beat patrollers ubos sa Mabolo Police Station ang Qimonda. (BANAT NEWS)