Nakigpinusilay, tulo nadakpan

CEBU, Philippines — Nasikop sa  kapolisan ang tulo ka mga giila nga bag-ong pusher og shabu human  sa nahitabong sinukliay og  bala sa Sitio Pundok, Barangay  Cabangahan, Lungsod sa Consolacion sa miaging gabii. Si Police Officer 2  George Tapales sa Consolacion Police Station ang miila sa mga nadakpan nga mao sila si Loard Cham “Amply” Malano, Maria Tomakin, 20 ug Jerwin Brigoli, 19, pulos nagpuyo sa maong dapit.

Matud pa ni  Tapales nga nagpahigayon og buy- bust operation ang mga sakop sa Consolacion Drug Enforcement Unit (CDEU)  tungod sa nagpadayon nga kalihokan sa maong mga dinakpan.

Apan sa paghidangat sa mga polis sa maong lugar namatikdan dayon sila sa mga suspetsado ug kalit nga namusil sa grupo ni SPO3 Leoben Sebomit. Atol sa ginukoray nadakpan ang tulo samtang nakasibat ang ilang kaubanan. Nasakmit gikan nila ang 12 ka gagmay nga paketeng shabu ug usa ka kalibre 357 revolver. (IBM) (BANAT NEWS)