Ancajas mo-debut na sa U.S. karon
CEBU, Philippines — Ang Pinoy’ng kampiyon nga si Jerwin Ancajas gitawag ni Top Rank promoter Bob Arum nga maoy sunod nga Manny Pacquiao.
Si Ancajas mosuway pagpamatuod nga wala masayop si Arum sa iyang pangagpas sa dihang modepensa na siya sa iyang IBF super flyweight title batok ni Mexican challenger Israel Gonzalez sa iyang US debut karong adlawa didto sa American Bank Center sa Corpus Christi, Texas.
Yanong gikuha sa duha ka boksidor ang saktong timbang atol sa official weigh-in kagahapon, timaan sa ilang kaandam sa gikatakda nga 12 ka hugna nilang bakbakay.
Si Ancajas gihulagway ni Arum nga maoy mosunod sa lakang ni Pacquiao, apan ang 26-anyos nga garbo sa Panabo City nagkanayon nga wala kaayo kini niya huna-hunaa og maayo gumikan kay nakapokus ang iyang atensiyon sa iyang tahas batok ni Gonzalez.
Diriyot miulbo ang tensiyon pipila ka gutlo human sa tinimbangay gumikan kay sila si Ancajas ug Gonzales hait kaayong nagtinutokay ug hapit pa magpakong ang ilang mga ulo.
Apan si Ancajas wala mahadlok sa gipakitang taras sa Mehikano.
Si Ancajas adunay 28-1-1 record uban ang 19KOs, samtang si Gonzalez kausa pa lamang mapilde sa 22 ka away, apan walo ra ang iyang daog pinaagi sa knockout.
Si Ancajas modepensa sa korona sa IBF nga iyang nasakmit human gipilde ang kanhi kampiyon nga si McJoe Arroyo sa Puerto Rico niadtong Septiyembre 3, 2016 didto sa Taguig. Tulo ka higayon niyang napanalipdan ang iyang trono human mikulit og impresibong kadaogan batok nilang Jose Alfredo Rodriguez didto sa Macau, Teiru Konashita didto sa Brisbane, Australia ug Jaime Conlan didto sa Belfast, Northern Ireland.
Samtang si Gonzalez mikulit og walo ka sagunson nga daog human nakatilaw sa labing una ug bugtong pa lamang nga pilde sa iyang karera batok sa kababayan niyang si Argi Cortes niadtong Abril 2, 2016.
- Latest