CPADAO mopahigayon na usab og drug test

CEBU, Philippines — Sugod sa sunod semana ipatuman pagbalik sa Cebu Provincial Anti-Drug Abuse Office (CPADAO) ang “drug free workplace policy” pinaagi sa pagpahigayon og drug test sa mga kawani sa gobiyerno.

Si Carmen Remedios Durano-Meca pangulo sa CPADAO nagkanayon nga karong tuiga motutok sila sa mga opisyal ug trabahante sa barangay.

Ang CPADAO nakadawat kini og mga report sukad pa niadtong miaging tuig kalabot sa mga opisyal sa barangay nga nalambigit sa ilegal nga drugas apan wala hinuon sila makadawat og report nga dunay mga opisyal sa barangay nga drug dependent.

Si Meca nagkanayon nga importante nga masigurado nga walay nalambigit sa ginadiling drugas gikan sa mga barangay hilabina nga sila ang nagsilbing front liners sa paghatag og serbisyo sa publiko.

Samtang sa community based treatment program sa mga lokal nga kagamhanan sa probinsiya padayon karon ang pagpaubos sa training sa mga personnel gikan sa Barangay Anti-drug Abuse Council ug mga medical personnel sa LGUs alang sa rehabilitation nga gipahigayon sa Department of Health.

Sa pagkakaron 23 pa ka lungsod ang wala pa gihapon kasugod sa community based treatment program sanglit wala pa ma-train ang mga personnel niini. (BANAT NEWS)