Padung molabay’g basura sa dagat nadasmagan patay

CEBU, Philippines — Patay ang 67-anyos nga lalaki human naligsan sa sakyanan sa Provincial Disaster Risk Reduction and Management Office (PDRRMO) diha sa South Road Properties (SRP) habig sa Barangay San Roque, dakbayan sa Talisay kagahapon sa buntag.

Ang namatay nailhan nga si Rodrigo Sumobay, taga Sitio Kalinaw sa maong barangay. Matud pa ni PO2 Amelito Hornales sa Talisay City Traffic Division nga gikan sa Siyudad sa Sugbo ang sakyanan sa PDRRMO nga gimaneho ni Nicolas Matugas, 48 , taga Barangay Lawaan 1 sa nahisgutang dakbayan padung sa habagatan.

Si Hornales niingon nga Hi-Lux pick-up ang gimaneho ni Matugas nga aduna’y plate number SKN-712. Apan sa dihang niagi sila sa taytayan nga nagdugtong sa Talisay ug Siyudad sa Sugbo kalit nilabang ang maong tiguwang nga nagbitbit og basura nga iya untang ilabay ngadto sa dagat hinungdan nga naigo gyud kini sa sakyanan nga maayo niyang pagkalagpot.

Gidala kini sa Don Vicente Sotto Memorial Medical Center apan pipila ka oras ang nilabay nabugtuan gyud kini sa iyang kinabuhi.

Sakay sa maong pickup ang lima ka empleyado sa PDRRMO nga sila si Julius Regner ang tigpamaba sa buhatan ug sila si Rose Placencia, Lavernia Velez,  Wela Ybas ug lain pang babaye nga empleyado.

Matud ni Baltazar Tribunalo, pangulo sa PDRRMO nahibalo na niini si Gob. Hilario Davide III ug nimando sa mga angay nga buhaton.  Dugang niya nga ang Kapitolyo usab ang mogasto tanan gikan sa haya hangtod na sa lubong ni Sumobay. (BANAT NEWS)