Talisay police may bag-ong sakyanan, motor

CEBU, Philippines — Nadawat na sa kapolisan sa Dakbayan sa Talisay ang upat ka motorsiklo ug usa ka sakyanan sa niaging semana atol sa kasaulugan sa ika-17 ka tuig nga Charter Day gikan sa mga opisyal sa kagamhanan sa siyudad.

Una niini, si Mayor Eduardo Gullas nipasalig nga mapalit nila ang usa ka sakyanan nga ihatag sa polis sa buwan sa Nobiyembre, laing usa sa Disyembre ug usa karong buwana.

Apan niabot na lang ang buwan sa Enero, usa lang ka sakyanan ang niabot ug upat ka motorsiklo ang nahatag ngadto sa kapolisan.

Gipanghinaut ni Gullas nga ang laing duha ka sakyanan nga iyang gisaad  mahatag niya karong tuiga.

Ang motorsiklo mokantidad og P87 mil matag usa samtang mokantidad sa P800 mil ang Toyota Avanza.

Ang kapolisan nitataw nga ilang gamiton ang bag-o nilang sakyanan para sa ilang mga operatiba diin dili nila kini butangan og marka kay kini gamiton sa ilang mga operasyon ug aron dili dali mailhan.

Gikalipay nila nga naabot na ang sakyanan nga makatabang sa ilang inadlaw nga gimbuhaton aron pabilin nga hapsay ug malinawon ang dakbayan.

Sa upat ka sakyanan sa polis sa dakbayan, usa o duha lang ang tarong nga nagdagan nga maoy gigamit sa matag operasyon. (BANAT NEWS)