Solar gamiton sa mga suga sa Talisay
Si City Engineer Gamaliel Vicente Jr. nibutyag nga ang matag usa ka solar panel mokantidad sa P80 mil ngadto sa P90 mil nga mapuslan na sa 15 ngadto sa 20 ka tuig. Asoy pa niya nga gigamit na kini nila sa City Hall, sa Barangay Tabunok ug sa mga lugar nga lisud maabot sa linya sa Visayan Electric Company (VECO). File
CEBU, Philippines — Gilauman nga maghayag na tibuok gabii sa Siyudad sa Talisay sa umaabot nga mga adlaw.
Kini human ang kagamhanan nipalit og mokabat napulo ka solar panel nga maoy gamiton sa elektrisidad.
Si City Engineer Gamaliel Vicente Jr. nibutyag nga ang matag usa ka solar panel mokantidad sa P80 mil ngadto sa P90 mil nga mapuslan na sa 15 ngadto sa 20 ka tuig. Asoy pa niya nga gigamit na kini nila sa City Hall, sa Barangay Tabunok ug sa mga lugar nga lisud maabot sa linya sa Visayan Electric Company (VECO).
Matud niya nga makadaginot gyud ang siyudad sa ilang paggamit sa solar panel apan iyang gibutyag nga wala ra sab nila gibiyaan ang VECO sama sa South Road Properties (SRP) nga mga suga.
Siya nagkanayon nga nagkasabot na sila sa VECO nga ang maong kompaniya na ang responsable sa pagtaud og nga bombilya o sa pagpasuga sa SRP. Nakahatag na sila og sodium lights nga moabot sa 200 kabuok ngadto sa VECO.
Ilang gisangon sa VECO ang pagpasuga sa SRP tungod kay guba ang ilang boom truck.
Sa nasayran nga niadto pang niaging tuig nga putol-putol ang kahayag sa maong karsada sa rason nga guba ang boom truck sa dakbayan. (BANAT NEWS)
- Latest
