Unom nadakpan sa PNP, PDEA
Unang operasyon nahitabo sa may Sitio Mahayahay, Barangay Calamba nga niresulta sa pagkasikop nila Juvy Taboada, 38, ug Marlon Tejano. File
CEBU, Philippines — Unom ka mga tawo ang nasikop sa managlahi nga anti-drug operations sa kapulisan ug mga sakop sa Philippine Drug Enforcement Agency gabii sa adlaw nga Biyernes ug kagahapong adlawa.
Unang operasyon nahitabo sa may Sitio Mahayahay, Barangay Calamba nga niresulta sa pagkasikop nila Juvy Taboada, 38, ug Marlon Tejano.
Matud pa ni Senior Inspector Narrolf Tan, Deputy Chief sa City Intelligence Branch nipahigayon sila og intensified police operations nga gipangulohan ni Police Chief Inspector Christopher Navida, human nakadawat sila og reklamo sa mga concern citizens nga naghitak ang ilegal nga drugas sa lugar.
Nasakmit gikan sa duha ang 11 gramos nga shabu nga mobalor og dul-an sa P130 mil.
Ikaduhang operation nahitabo sa may Gen. Gines, Street, Barangay Suba, nga gikasikop nila ni Albert Rafols, 30, ug Shanil Dacua, 31, ug nakuhaan og mga pinaketeng drugas.
Samtang ang Philippine Drug Enforcement Agency-7 gipangulohan ni Regional Director Emerson Margate nipahigayon usab og buy-bust operation sa may Sitio Magay, Barangay Tangke, Dakbayan sa Talisay nga gikasikop sa 60-anyos nga si Diosdada Aguilar, alyas Inday Yawa, nga nalakip sa ilang drug watch list.
Si Aguilar, nakuhaan og 11 ka putos nga shabu nga motimbang og 50 gramos nga mobalor og P250 mil. Laing operasyon ang gihimo sa may Barangay Biasong, sa Dakbayan sa Talisay, diin nasikop ang nalakip sa watch listed personality nga si Dandin Bas, 26, nga nakuhaan usab og P100 mil nga balor sa shabu. Ang mga dinakpan pasakaan og kaso ugmang adlawa. (BANAT NEWS)
- Latest
