Karaang balay nasunog
CEBU, Philippines — Naugdaw ang usa ka panimalay sa sunog nga nahitabo sa Poblacion, Lungsod sa Tabuelan niadtong Miyerkules sa gabii diin mokabat sa P50,000 ang gibiling danyos.
Ang panimalay gipanag-iya ni Armingol Arendain.
Si Fire Officer 1 Romualdo Paglinawan sa Tabuelan Fire Station nibutyag nga ilang nadawat ang alarma alas 9:40 sa kagabhion, pinaagi sa anak sa tag-iya sa balay nga si Charlemagne Arendain.
Si Fire Officer 1 Almar Bocado, chief operations officer sa Tabuelan Fire Station, niasoy nga paspas ang pagkatap sa kayo tungod sa ka karaan na sa panimalay nga ginama sa light materials.
"Dugay naman gud daw ning balaya, sir. Gikan pa ni sa mga apohan nila, mga 1950s pa daw," matud ni Bocado.
Matud ni Paglinawan nga ang kadaan sa electrical wirings mao ang posibleng hinungdan sa sunog.
Si Bocado niawhag sa mga nanag-iya og mga ancestral houses o mga karaang panimalay nga permanentihon ang pag-update sa ilang electrical wirings.
"Amo silang giawhag nga kining mga wiring nga karaan, ipa-recheck or mas maayo, palinyahan na gyud og bag-o kay para safe kay tungod sa kadugay pwede mana mo-brittle or napaakan na ba na sa mga ilaga," matud ni Bocado. (BANAT NEWS)
- Latest
