Nabakunahan gidala sa tambalanan

CEBU, Philippines — Usa ka bata nga taga Dakbayan sa Talisay nga giingong nabakunahan niining kontrobersyal nga Dengvaxia vaccine ang gidala sa tambalanan kagahapon human kini gihilantan ug gisunggo.

Ang 10- anyos nga batang lalaki nga tinun-an sa Grade 5 ug taga Barangay Lawaan 3 gidala sa mga ginikanan sa Talisay City District Hospital kagahapon sa kaadlawon. Ang inahan sa bata nga nahinabi sa Banat News mitug-an nga Sabado nagsugod og hilanat ug nagsunggo ang anak. Gipainom kini og tambal sa hilanat ug nahuwasan.

Apan kagahapon sa kaadlawon nibalik ang hilanat ug misunggo na usab hinungdan nga ilang gidala sa TCDH. Matud pa sa inahan dinhi sa Banat News “suspected dengue” ang duda sa mga doktor.

Siya miingon nga bisan gihilantan ug nagsunggo ang anak lagsik kini sa ilang balay, apan tungod sa balita bahin sa giingong peligro sa bakuna gikuyawan sila kay wala pa sukad masakit og dengue ang ilang anak.

Si Harby Abellanosa, chief nurse sa Talisay City District Hospital nagkanayon nga luwas na ang bata kon itandi sa bag-o pa kining naabot kanila apan gibalhin kini sa pribadong tambalanan sa Siyudad sa Naga kagahapon sa udto. 

Si Abellanosa wala motug-an kon unsa ilang diagnosis kun dili kadto lang sitwasyon karon sa bata. Si Konsehal Richard Francis Aznar, chairman sa committee on health sa siyudad nagkanayon nga gi-monitor nila ang maong kaso.

Una kining kaso sa siyudad sukad nibuto ang kontrobersiya sa Dengvaxia. Singko mil ka bata sa Talisay ang nabakunahan niini.

Ang Sanofi Pasteur bag-ohay lang miingon nga posibleng adunay negatibong epekto sa mga wala pa sukad masakit og dengue ang maong bakuna apan maproteksyonan niini kadtong nabakunahan nga nakaagi na og dengue. (BANAT NEWS)