Brgy konsehal nasakmitan mga armas
CEBU, Philippines — Gidakop sa mga sakop sa Criminal Investigation and Detection Group-7 ang barangay konsehal pinasikad sa search warrant human nasakmiti og mga paltik nga armas sa Sitio Tunga, Matab-ang, Dakbayan sa Toledo kagahapon sa buntag.
Ang gidakop giila nga si Algerico Empinado Tanilon, 47, residente sa maong dapit.
Naimbargo ang usa ka Colt caliber .45, pito ka bala, usa ka Chip MC Cormick magazine alang sa kalibre .45 ug usa ka magazine sa kalibre .45.
Sumala pa ni Chief Insp. Chuck Barandog sa CIDG-Cebu Province nga nireklamo ang mga silingan tungod kay magdala-dala sa iyang armas ug magpabuto ang konsehal hinuon wala kini criminal record.
“Usa kuno siya sa nakapalinaw sa ilang barangay kay tabang kuno siya og sumpo sa ilegal nga drugas,” matud ni Barandog. Apan kasong paghupot og ilegal nga armas ang ipasaka batok sa dinakpan. (BANAT NEWS)
- Latest