Birhen sa regla isakay sa Galleon

CEBU, Philippines — Sa labing unang higayon ang  imahen sa Birhen sa Regla nga maoy patron sa Dakbayan sa Lapu-Lapu ang magsakay sa galleon nga gipanag-iya sa pamilyang Ouano sa Dakbayan sa Mandaue atol sa fluvial procession karong Nobiyembre 12.

Ang maong galleon mao ang sakyan sa tinuig nga fluvial procession sa imahen ni Senior Santo Niño. Ang ika-17 ka tuig nga fluvial procession sa imahen sa birhen magsugod sa alas 7 sa buntag sa Cebu Pacific Beach Resort sa Suba-Basbas human sa Santos nga Misa sa alas 4 sa kaadlawon sa Marigondon Parish Church diin bilaran tibuok gabii ang imahen.

Alas 7 sa buntag magsugod ang fluvial procession ug mopidpid sa baybayon sa Marigondon, Agus ug Maribago nga ubanan sa mga motor banca samtang ang chopper sa Philippine Air Force ang mosabwag sa mga buwak.

Ang mga sakop sa Philippine Navy ug Philippine Coast Guard maoy magtinabangay sa paghapsay sa dagan sa mga motor banca hangtud sa Barangay Mactan lahos na sa Mactan Channel sa Ibo, Pusok ug Pajo.

Si Senior Superintendent Rommel Cabagnot, director sa Lapu-Lapu City Police Office (LLCPO), kusganon nga nag-awhag sa mga deboto sa Birhen sa Regla nga likayan lang ang pagpaboto og rebentador atol sa kalihukan.

Sa pagdunggo sa galleon sa Muelle Osmeña sa Barangay Poblacion nga nahimutang luyo sa simbahan sa parokya sa Birhen sa Regla sa Barangay Poblacion, maoy mosugat sila si Mayor Paz Radaza ug kaubanang mga opisyal, ug mga deboto. (BANAT NEWS)