Motor banca sa Tudela wa pabiyahia

CEBU, Philippines — Gisuspenso ang operasyon sa usa ka kompaniya sa motor banca sa lokal nga kagamhanan sa Lungsod sa Tudela, Isla sa Camotes tungod sa kapakyas sa pagkuha og Mayor’s permit sa tag-iya.

“The operation of M/B Junmar in this LGU owned/maintained port ordered suspended by authority of the Tudela Municipal Government,” base sa notice of suspension.

Matud ni Tudela Mayor Erwin Yu nga kapila na sila nipadala og suwat sa tag-iya sa maong motor banca apan wala panumbalinga.

Giingong igo lang nangutana sa sumada sa ilang bayranan apan wala na mobalik.

Unang suwat mao ang pagpalukat og permit niadtong Pebrero 3, gisundan niadtong Pebrero 27 ug ka duha sa buwan sa Septiyembre ug uwahi na karong semanaha.

Ang bayranan sa paglukat og permit moabot sa P22 mil alang sa tibuok operasyon apan sumala ni Yu nga wala motuman ang tag-iya hinungdan nga napugos sila pagsuspenso niini.

Matud niya nga dugay ra nag-operate ang maong motor banca nga permit ra sa Maritime Industry Authority ang gigunitan. Ang motor banca mao kini ang mohatud og mga pasahero nga mopadulong ug mogikan sa Ormoc, Leyte.

Sumala pa ni Yu nga dili hinoon makaapekto sa pagbiyahe sa mga pasahero ang pagkasuspenso sa maong motor banca sanglit aduna may RoRo nga nagbiyahe usab gikan sa pantalan sa Tudela padulong sa Ormoc. Ang Banat News nisuway pa pagpangita sa pangalan ug numero sa tag-iya sa maong motor banca apan pakyas pa sa pagkontak. (BANAT NEWS)