PNP-Petron Ligtas Project subling gilusad

CEBU, Philippines — Gilusad pagbalik sa Police Regional Office-7 ang PNP-Petron Lakbay Ligtas Project, programa sa pagtabang sa kapolisan sa ilang pagpatunhay sa kahapsay ug kalinaw ilabi na nga nagsingabot ang mga dagkong kalihukan.

Ang maong proyekto una nang gilusad niadtong 2015 apan sa panahon lang nga adunay dagkong kalihukan sama sa Kalag-kalag ug Pasko apan niining higayona tinguha ni PRO-7 Director Jose Mario Espino nga magpermanente na kini.

Ang Lakbay-Ligtas Program naghatag og pagtugot sa kapolisan sa pagpahimutang og mga police outpost sa mga gas stations sa Petron sa tibuok Central Visayas ug gitinguha nga mahimong lukop nasud.

Ang outpost magsilbing tambayan sa mga police patrollers ilabi na panahon sa mga rush hours o kung adunay bagang duot sa katawhan ilabi na panahon sa dagkong kalihukan.

Mahimo usab kining kaduolan sa mga tawo nga nanginahanglan og police assistance

Ang re-launching sa programa gihimo sa Barangay Pajo, Dakbayan sa Lapu-Lapu.

Matud ni Barangay Kapitan Junard Chan nga dako kaayo kini og tabang ilabi na sa ilang lugar diin daghang mga langyaw ug lokal nga turista nga mag-abot. (BANAT NEWS)