Lab-asera nag-pusher sikop
CEBU, Philippines — Prisohan ang nasangputan sa usa ka ginang human siya nadakpan sa operasyon labot sa ginadiling drugas sa Sitio Tunga, Tangke, Dakbayan sa Talisay niadtong Martes sa alas 4:30 sa hapon.
Ang dinakpan mao si Jeseta Surigao alyas Gin-Gin, 57, minyo, kinsa gihulagway ni PO2 Stephen Sefuesca nga bag-ong player sa ginadiling drugas human gipul-an sa pagpamaligya og isda.
Gamit pa gihapon sa ginang ang sayal sa pagpamaligya og isda nga adunay dakong bulsa sa atubangan.
Nakuhaan si Surigao og 12 ka gagmay nga pakete sa shabu.
Samtang nasikop sa follow-up buy-bust operation sa Consolacion Police, Provincial Drug Enforce Unit (PDEU) ug Lapu-Lapu City Police Office ang duha ka tigpayuhot og drugas niadtong Huwebes sa hapon sa Poblacion, Dakbayan sa Lapu-Lapu.
Ang mga suspek giila nga sila si Joyce Cabahug, taga Dapdap, Compostela, ug Mildred Palmera, 33, taga Sitio Molave, Poblacion, Lapu-Lapu City, pulos mga street value target kinsa nakuhaan og gibana-banang 50 ka gramo sa shabu nga balor og P590 mil. Si Cabahug ang subject sa operasyon human gitug-an sa usa ka dinakpan.
Apan si Cabahug giingong nakabantay nga polis ang iyang ka-transaksyon hinungdan nga dali kining nieskapo samtang wala nakadagan dayon si Palmera nga nisangpot sa iyang pagkasikop. (BANAT NEWS)
- Latest
